Navalnyı kolonıada qaıtys boldy: onyń tromby úzilip ketken.
Alekseı Navalnyı Har degen eldi-mekendegi «Polárnyı volk» túzetý kolonıasynda qaıtys boldy, dep habarlaıdy Almaty-akshamy.kz
Navalnyı ólimi jaıly Iamalo-Nenes avtonomıalyq okrýginiń federaldy jazany oryndaý qyzmeti basqarmasy málimdegen.
«Sottalǵan Navalnyı A.A. serýendep kelgennen keıin, ózin nashar sezinip, birden esinen tanyp qalǵan.
Mekemeniń medısına qyzmetkerleri dereý kelip, jedel medısınalyq járdem brıgadasy shaqyryldy.
Barlyq qajetti reanımasıalyq is-sharalar ótkizildi, biraq olar oń nátıje bermedi. Jedel medısınalyq kómek dárigerleri sottalýshynyń qaıtys bolǵanyn aıtty», - delingen resmı túrde taralǵan aqparatta.
Esterińizge sala keteıik, Alekseı Navalnyı - reseılik saıasatker, zańger, eldegi jemqorlyq pen paraqorlyqty áshkereleıtin tergeýler arqyly aty shyqqan opozısıa kóshbasshylarynyń biri bolatyn.
Navalnyı, eki ret shartty túrde sottalǵan, «Iv Rosher» isi boıynsha jazasyn óteý sharttaryn birneshe ret buzǵany úshin oǵan ezdeý jarıalanǵan edi. 2021 jyldyń 2 aqpanynda sot oǵan shartty merzimdi naqty merzimge aýystyrý týraly sheshim qabyldady. Ol sondaı - aq 2022 jyldyń naýryzynda sotty qorlaǵany jáne saılaý naýqanyna qarajat jınaý alaıaqtyqtary úshin jáne 2023 jyldyń tamyzynda ekstremıstik qoǵamdastyq qurǵany úshin kináli dep tanyldy.
Jaqynda Reseıde 15-17 naýryz aralyǵynda prezıdent saılaýy ótedi. Saıası oppozısıonerdiń ólimi bul naýqanǵa qalaı áser etedi jáne bul ólim qastyq bolýy múmkin be degen saýalǵa saıasattanýshy, «Alatau aqparat» medıaholdınginiń sarapshysy Perdehan Shámshıev jaýap berdi.
«Menińshe, reseılik oppozısıoner Alekseı Navalnyıdyń ólimi qastandyq emes. Árıne, tergep-tekserý nátıjesin kútý kerek. Biraq onyń densaýlyǵy nasharlaǵany bárimizge belgili.
Kreml álde onyń saıası dushpandary tarapynan qastandyq jasaldy dep te aıta almaımyn. Sebebi, bir aıdan soń 15-17 naýryzda Reseıde Prezıdent saılaýy ótedi. Saılaýdan aldyn Kremlge azamattyq qoǵam jáne Navalnyıdyń jaqtastary tarapynan narazylyq kóńil-kúıdiń óskeni qajet emes. Iá, saıası tehnologıa turǵysynan saılaýdan aldyn saıası jáne azamattyq belsendilerdi osyndaı qastandyq arqyly qorqytý durys bolar, biraq uzaq ýaqyttyq perspektıvada kerisinshe áser etýi múmkin. Navalnyıdyń ólimi aldaǵy saılaý naýqanyna ǵana emes, Reseı men Ýkraına arasyndaǵy daǵdarysqa da áser etýi múmkin dep aıtar edim. Árıne Máskeýge bul tıimdi emes», - deıdi saıasattanýshy Perdehan Shámshıev.