Almaty qalasyndaǵy SOS balalar aýylynda tárbıeshiler men psıhologtarǵa arnalǵan «Konflıktologıa jáne medıasıa negizderi. Etnomedıasıanyń erekshelikteri men qaǵıdalary» taqyrybynda semınar-trenıng ótti.
Bilim jetildirý dárisin Almaty qalasy QHA etnomedıasıa keńesiniń tóraǵasy, «Halyqaralyq quqyq qorǵaý ortalyǵy» RQB Prezıdenti Jandildá Jaqypov qaıyrymdylyq negizde ótkizdi. Sondaı-aq, Assambleıanyń «Jomart jan» ortalyǵy balalarǵa arnalǵan qaıyrymdylyq aksıasyn uıymdastyrdy. Igi sharany Almaty qalasy Ádilet basqarmasynyń «Qoǵamdyq kelisim» KMM, «Assambleıa jastary», «Jomart jan» ortalyǵy jáne Almaty qalasy Qazaqstan halqy Assambleıasynyń Aqsaqaldar keńesi birlesip uıymdastyrdy.
«Memleket basshysy Qasym-Jomart Toqaevtyń tapsyrmasyna sáıkes elimizde Naýryznama tujyrymdamasy bekitilgen bolatyn. Búgin biz sonyń aıasynda Almaty qalasyndaǵy SOS balalar aýylyna keldik. Bul shara Qazaqstan halqy Assambleıasynyń 30 jyldyǵyna arnalǵan mańyzdy is-sharalardyń biri ekenin aıta ketken jón. «Jomart jan» qaıyrymdylyq ortalyǵynyń ókilderi balalarǵa dep trenıńter men oıyndarǵa arnalǵan qural-jabdyqtardy syıǵa tartty. Sonymen qatar, Qazaqstan uıǵyrlarynyń respýblıkalyq mádenı ortalyǵynyń tóraǵasy Dolkýntaı Abdýlhalıl túrli syılyqtaryn ala keldi. Kezdesý aıasynda balalarǵa Naýryz merekesiniń mán-mańyzyn túsindirip, túrli oıyndar uıymdastyrdy. Balalarǵa qýanysh syılaǵan bul shara – halqymyzdyń bereke-birliginiń, baýyrmaldyǵynyń dáleli», – deıdi Almaty qalasy QHA aqsaqaldar keńesiniń tóraǵasy Bolat Ospanov.
«Jomart jan» ortalyǵynyń tóraǵasy Dolkýntaı Abdýlhalıldiń aıtýynsha, Prezıdentimiz jastardy elin súıetin, bilimdi, adal, jaýapkershiligi mol azamat etip tárbıeleýge erekshe kóńil bólip otyr. Osy maqsatta biz de óz jumysymyzdy jandandyryp, túrli ıgi isterdi qolǵa aldyq. Bul bastamaǵa Assambleıa janyndaǵy Aqsaqaldar keńesi men belsendi jastar birlesip atsalysty.
«Balalarǵa syılyqtar men túrli tartý jasap, merekelik kóńil-kúı syıladyq. Assambleıa aıasynda biz jastarmen jıi kezdesip, olardy eline adal qyzmet etetin, týǵan eliniń damýyna úles qosatyn azamat retinde tárbıeleýge kúsh salyp keledi. Yntymaqtastyqty arttyryp, jastardyń patrıottyq rýhyn kóterý – basty maqsattarymyzdyń biri. Qazir «Taza Qazaqstan» baǵdarlamasy qolǵa alyndy. Osy naýqan da jastardy tárbıeleýdiń bir baǵyty. Bir adamnyń nemese belgili bir toptyń mindeti emes. Sondyqtan barshamyz birige jumys istep, ortaq maqsatqa umtylýymyz kerek. Naýryz merekesi qutty bolsyn! Árbir shańyraqqa baqyt, yntymaq, qýanysh tileımin! Elimiz tynysh, halqymyz aman bolsyn!», – dedi ol.