Naýryz – kóktem men jańarý merekesi. Kún men túnniń teńelip, Jer dúnıeniń qulpyratyn shaǵy.
Mereke qarsańynda Almaty qalasy ákimdigi men ortalyqtandyrylǵan kitaphanalar júıesiniń uıymdastyrýymen Naýryz meıramy aıasynda aqyn, Halyqaralyq «Alash» ádebı syılyǵynyń laýreaty Baqyt Bedelhannyń «Naýryzda jalǵyz týǵam joq!» atty shyǵarmashylyq ádebı sazdy-dýmany ótkizildi. Búginde bútin el azamaty, el aǵasy atyna ábden laıyq ulyn jurty jatsynbaı, jylyshyraımen qabyldap, mártebesin asyrdy.
Áýelegen án shyrqalyp, janǵa nár beretin jyr oqylyp, tyńdarmandardy ózine tánti etti. Dýmannyń alǵashqy sózin týǵan kún ıesi Baqyt Bedelhan bastap, dál sol kúni qazaqtyń klasık jazýshysy Ǵabıt Músirepov, M.Áýezovtiń aldynda án salǵan Jánibek Kármenovterdiń týǵanyn atap ótti. Ári qaraı óleńmen órbitip, inilik izetpen kezekti sózdi Bekjan Turysqa tabystady. Akter aǵalyq aq tilegin aıtyp, izgi nıetin bildirdi.
Aqynnyń sózine jazylǵan lırıkalyq ta rýhty ánder tyńdarman kóńilin kókke jetelep, kórkem ıirimdermen este qaldy. Ǵ.Músirepov aıtqan «Has sulýdyń kóz jasyndaı móldir óner» jolyndaǵy aqynnyń qajyrly eńbegi «Temiren», «Asyltas» teatrlarynyń akterleri daıarlaǵan kompozısıalyq qoıylymdarynan kórinis tapty. Kesh qonaqtary Safýan Sháımerdenov, Maqsat Jáýtikov, Roza Álqoja, Aıbek Muhametáli, Jiger Aýypbaev, Áset Esjan, Saǵynysh Senbi, Gúljanat Muhametjan halyqty merekemen quttyqtap, ásem ánderimen júrek terbep ketti. Qudaıdyń qutyndaı bop, ulystyń uly kúnimen qatar kelgen ataýly kún qystan aman shyqqan halyqtyń arqasyn keńge jazyp, máre-sáre kúıge túsirip, bir qýantqan dýmanǵa ulasty. İrgesi buzylmaǵan elge tynyshtyq, el eńsesin tikter erge qýat tiledik! Halyq bop qýanar qýanyshymyz kóp bolǵaı!