Almatyda merdigerlerdiń jaýapsyzdyǵynan kóbine turǵyndar zardap shegedi. Osy rette shahar basshysy qazir qalada qurylys jumystary qarqyn alǵanyn, eger zań buzýshylyqtar oryn alsa, merdigerler jaýapkershilikke tartylatynyn qatań eskertti. Degenmen megapolıste jumysyna salǵyrt qaraıtyn kompanıalar azaımaı tur.
Máselen, Naýryzbaı aýdanynyń «Qalqaman-2» shaǵynaýdanyndaǵy N.Nurmaǵanbetov kóshesi №56 úıdiń mańynda ornalasqan sporttyq alań qırap jatyr. Onyń janyndaǵy qysta jasalǵan brýschatkalar oıylyp, jerge kirip ketken. Oryndyqtar qulap, jaramsyz bolyp qalǵan. Mundaı sapasyz salynǵan dúnıeler aýdannyń kelisti kelbetin buzyp, syrttan, ásirese, ózge qaladan keletin qonaqtarymyzǵa jaǵymsyz kórinis qaldyratyny sózsiz.
Qazirgi tańda kóshe turǵyndary aýlaǵa abattandyrý jumysyn júrgizgen merdigerlerdiń jumysyna rıza emes. Onymen qosa, kompanıa sport alańyn aıaǵyna deıin jasamaı, orta joldan tastap ketken eken. Iaǵnı qysta jasaǵan jumys áli bitpeı tur. Ol jerge adam kóp kelmeıdi dep oılaǵan ba, merdigerler óz jumysyn tipten sapasyz jasaǵan. Dánekerlegen temirleri synyp, qırap tur. Osylaısha qysta salynǵan dúnıe jazǵa jetpeı búlinip, sıqy kete bastady. Naýryzbaı aýdanynyń ákimdigi, atalmysh kósheni abattandyrýdy qandaı merdiger júrgizgen? Nege ony aıaǵyna deıin bitirmeı, tastap ketken? Bul bassyzdyq qashanǵa deıin jalǵasady? Mundaı jaýapsyzdyqqa tosqaýyl qoıatyn kez keldi emes pe?!
Qashan da tártip pen baqylaý joq jerde jumysqa júrdim-bardym qaraýshylyq oryn alady. Sondyqtan aýdan ákimdigi jasalǵan jumystyń sapasyna kóńil bólip, baqylaýǵa alsa, durys-aq bolar edi. Oryn alǵan olqylyq der kezinde qalpyna kelse degen usynysymyz bar.