Atyraýda Ulystyń uly kúni qarsańynda stýdentterdiń «Biz janbasaq...» respýblıkalyq aıtysy ótti
Stýdentterdiń aıtysy akademık Zeınolla Qabdolovtyń 95 jyldyǵyna arnaldy. H.Dosmuhamedov atyndaǵy Atyraý ýnıversıteti uıymdastyrǵan aıtysqa elimizdiń joǵary oqý oryndarynan 16 stýdent qatysty, dep habarlaıdy Almaty-akshamy.kz QazAqparatqa silteme jasap.
Aıtystyń bas júldesine Nur-Sultan qalasyndaǵy Qazaq ulttyq óner ýnıversıtetiniń stýdenti Batyrjan Kádirbaı laıyq dep tanyldy. Birinshi júldeni T.Júrgenov atyndaǵy Qazaq ulttyq óner akademıasynyń stýdenti Raıymbek Ótepov ıelendi. Ekinshi júldege Qaraǵandy tehnıkalyq ýnıversıtetiniń stýdenti Bekarys Ospanov ıe boldy. Úshinshi oryndy Batys Qazaqstan ınovasıalyq-tehnıkalyq ýnıversıtetiniń stýdenti Bımyrza Ábilqaıyr men Nur-Sultan qalasyndaǵy medısınalyq ýnıversıtettiń stýdenti Saǵynysh Smet enshiledi.
Sondaı-aq, qazaq ulttyq óneri – aıtysqa bet burǵan stýdentterge 6 arnaıy júlde berildi. Máselen, Isataı aýdanynyń ákimdigi Nasıhat Súgiruly men Nuraly Ájiǵalıev, Qyzylqoǵa aýdanynyń ákimdigi Kádirbaı Jolaev pen Maqsot Sarkenjeev atyndaǵy arnaıy qarjylaı syılyq usyndy. Al, jylyoılyq óner janashyrlary Salaýat Isaqaev atyndaǵy júldege demeýshilik jasady.