Naýryznamanyń onkúndigin toılaý kezinde 19 naýryzda Qazaqstanda Jańarý kúni atap ótiledi. Bul kúni qalanyń aýdandarynda kóshet egildi. Shahar boıynsha barlyǵy 400-den astam aǵash otyrǵyzyldy, dep habarlaıdy almaty-akshamy.kz
Almatynyń Naýryzbaı aýdanynda Shuǵyla shaǵyn aýdany, 345/3 mekenjaıyndaǵy №200 mektepte balalar men ata-analar 100 týıa otyrǵyzdy. Aksıaǵa qatysýshylar úshin «Qara jorǵa» ulttyq bıi boıynsha fleshmob, ulttyq sport túrleri boıynsha jarystar uıymdastyryldy, sonymen qatar, baýyrsaq pen naýryz kóje taratyldy.
Áýezov aýdanynda №116 jáne №119 mektepterdiń fýtbol alańdaryna 125 týıa aǵashy otyrǵyzyldy. Kóshet egýge aýdan ardagerleri, komúnıtı ortalyqtyń jastary, oqýshylar jáne t.b. eriktiler qatysty.
Almatynyń Bostandyq aýdanynda 60 qaıyń otyrǵyzyldy. Onyń 10-y - Sátbaev kóshesi, 90/64 mekenjaıyndaǵy №189 bóbekjaı-baqshasynyń aýmaǵynda jáne 60-y – Tuńǵysh Prezıdent saıabaǵynda. İs-sharaǵa aýdan jastary men «Amanat» aýdandyq partıasynyń ókilderi qatysty.
Almatynyń Alataý aýdanynda Saıaly shaǵyn aýdanynyń 204 mektebinde aǵash otyrǵyzyldy. Onda 100 kóshet egildi, olar sánaǵash pen qaraǵash. Naýqanǵa aýdan ákimi Azamat Qaldybekov qatysty. Aǵash otyrǵyzylǵan soń mektepte Naýryzǵa arnalǵan merekelik konsert ótti.
Qalanyń basqa aýdandarynda aǵash otyrǵyzý jalǵasyp jatyr. Sonymen qatar, bıyl 320 myń aǵash pen buta otyrǵyzý josparlanǵan. Bul rette, Almatynyń kógaldandyrylǵan aýdanyna erekshe nazar aýdarylady. 2030 jylǵa qaraı qalada 2,5 mln. astam jasyl jelek otyrǵyzylady.
Esterińizge sala keteıik, bıyl Naýryznamnyń onkúndigi 14-23 naýryz aralyǵynda toılanady. Sonyń aıasynda qalada kóptegen is-shara ótip jatyr, olardyń tolyq tizimin Almaty qalasy ákimdiginiń saıtynan kórýge bolady.