2025 jyldyń 21-23 naýryz aralyǵynda Almaty qalasynda Naýryz merekesine oraı erekshe «Tátti káde-syı syılyqqa» aksıasy uıymdastyrylady, dep habarlaıdy aqshamnews.kz
Bul shara Almaty qalasynyń Týrızm basqarmasynyń, Almaty halyqaralyq áýejaıynyń, Almaty shekaralyq baqylaý qyzmeti men «Jetisý» keden beketiniń birlesken bastamasymen júzege asyrylýda. Aksıanyń negizgi maqsaty — qalaǵa kelgen sheteldik týrıserge merekelik kóńil-kúı syılaý jáne qazaq halqynyń qonaqjaılyǵyn kórsetý. Osy shara aıasynda Almatyǵa kelgen shamamen 10 myńǵa jýyq sheteldik jolaýshyǵa syı-qurmet kórsetiledi.
Naýryz — Qazaqstannyń eń mańyzdy ári qadirli merekeleriniń biri. Bul meıram jańarý men birliktiń sımvoly bolyp tabylady. Aksıa barysynda árbir týrıs, Almatyǵa kelip qonǵannan keıin, halyqaralyq jolaýshylar termınalyndaǵy pasporttyq baqylaý men kedendik tekserý aımaqtarynda ulttyq oıý-órnektermen bezendirilgen jáne kóktemniń sımvoldarymen naqyshtalǵan tátti káde-syı — ulttyq táttilerin alady. Bul is-shara Qazaqstannyń baı mádenı murasyn tanystyrýǵa jáne Almatyǵa kelgen qonaqtarda osy qala týraly jyly ári jaǵymdy estelikter qaldyrýǵa baǵyttalǵan.
Áýejaıda sondaı-aq arnaıy fotozona uıymdastyrylyp, ulttyq naqyshtaǵy bannerlermen bezendiriledi. Jolaýshylarǵa qazaqtyń dástúrli kıimderine (shapan) kıinip, estelik sýretke túsý múmkindigi beriledi. Árkim ulttyq kıimde ózin qazaq halqynyń qonaqjaılyq dástúriniń bir bólshegi retinde sezinip, umytylmas esteliktermen qalaǵa qoshemet bildiredi.
Almaty — sheteldik týrıser úshin Qazaqstannyń eń tanymal qalalarynyń biri. Qala eldiń halyqaralyq týrızm aǵynynyń 52,3%-yn qabyldaı otyryp, óz tarıhy, mádenıeti men tabıǵatymen álemniń túkpir-túkpirinen kelgen saıahatshylar úshin tartymdy ortalyq bolyp qala beredi