Almatyda Ulystyń uly kúni – Naýryz meıramyna oraı qoǵamdyq kólikter merekelik naqyshta bezendirildi. 20 naýryz ben 22 sáýir aralyǵynda qala kóshelerimen ulttyq órnektermen kómkerilgen 90 avtobýs pen 10 troleıbýs qatynaıdy. Bul týraly Aqshamnews.kz saıty habarlaıdy.
"Almatyelektrotrans" kompanıasynyń málimetinshe, qoǵamdyq kólikterge qazaqy oıý-órnekter, kóktemgi jańarýdy beıneleıtin elementter men Naýryz meıramynyń sımvolıkasy salynǵan. Bezendirý jumystary kóktemgi merekeniń erekshe rýhyn sezindirýge jáne qala turǵyndary men qonaqtaryna kóterińki kóńil-kúı syılaýǵa baǵyttalǵan.
Kompanıa ókilderiniń aıtýynsha, bul bastama Almaty qalasynda jyl saıynǵy dástúrge aınalyp keledi. Merekelik dekorasıalar qalanyń kóktemgi kelbetin tolyqtyryp qana qoımaı, turǵyndardyń ulttyq merekege degen súıispenshiligin arttyra túsedi.
Naýryz meıramy – tabıǵattyń jańarýy men halyqtyń birligin beıneleıtin erekshe mereke. Almaty kóshelerinde sándengen avtobýstar men troleıbýstardyń qatynaýy qala turǵyndary men qonaqtaryna merekelik kóńil-kúı syılap, ulystyń uly kúniniń shynaıy rýhyn sezinýge múmkindik beredi