Almatynyń Bostandyq aýdanynda ornalasqan avtoturaqtan 17 myń dollar urlanǵan.
Qaskóıler Lexus kóliginiń ıesi joqtyǵyn paıdalanyp, esik qulpyn skaner arqyly ashyp, sol jerden aqsha salynǵan sómkeni urlap ketken, dep habarlaıdy Almaty-akshamy.kz Polisia.kz-ke silteme jasap.
«Bul qylmysty ashý maqsatynda jedel-tergeý toby qurylyp, arnaıy is-sharalar kesheni júrgizildi. Nátıjesinde kúdiktiler ustalyp, qamaýǵa alyndy. Olar – Almaty oblysynyń ártúrli aýylynyń turǵyndary. Kúdiktilerdiń turǵylyqty jerlerinde tintý júrgizilip, qylmystyq is materıaldaryna zattaı aıǵaqtar qosyldy. Sonymen qatar qylmys bolǵan jermen shektesetin aýmaqtardyń beınebaqylaý júıelerine jan-jaqty taldaý júrgizildi», – dedi Almaty qalalyq polısıa departamenti bastyǵynyń orynbasarynyń mindetin atqarýshy Qýatbek Naýatov.
QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.