Almaty tehnologıalyq koleji 1975 jyly dańqy sol kezdegi Keńes Odaǵyna keńinen tanylǵan ataqty AHBK-ǵa jumysshy kadrlar daıyndaý maqsatynda ashylǵan edi. Oqý ordasy «Almaty maqta-mata kombınaty» úshin maman daıarlaıtyn №203 qalalyq kásiptik- tehnıkalyq ýchılıshe dep ataldy.
Sol jyldary oqý ordasyna tek óz elimizdiń jastary ǵana emes, barlyq odaqtas elderden arnaıy kelip bilim ala bastady. Máselen, 1975–1998 jyldar aralyǵynda ýchılıshe AHBK úshin toqymashy, ıirýshi, lentalyq jáne tegisteý jabdyqtarynyń operatory, oraýshy, toqyma jáne ıirý óndirisi sheberleriniń kómekshileri, mata sapasyn baqylaýshylar, elektr monterleri, raklıster, tiginshiler mamandyqtary boıynsha 8120 joǵary bilikti maman daıarlady.
1991 jyly oqý orny №1 joǵary kásiptik ýchılıshe bolyp qaıta qurylsa, 1997 jyly Almaty qalasy Bilim basqarmasynyń «№1 kásiptik lıseıi» dep ataldy. Oqý orny eńbek naryǵynyń, ekonomıkanyń talaptaryna sáıkes keletin kásipter men mamandyqtarǵa qaıta beıindeldi. Jańa oqý-josparlaý qujattamasyn, modýldik oqý baǵdarlamalaryn synaqtan ótkizý, áriptes kásiporyndardyń rólin edáýir kúsheıtýdi kózdeıtin bilikti kadrlar daıarlaýdyń kooperatıvtik júıesin engizý qolǵa alyndy.
Lıseı bazasynda ádistemelik jumys, pedagogıkalyq ınnovasıa jáne biliktilikti arttyrý ortalyǵyn qurý syndy mindetter saralandy. Naryq zamanynyń talabyna saı 1996-1997 jyldary «Shashtaraz» mamandyǵy boıynsha mamandar daıarlaýda «Qazaqstan–Túrkıa» jobasy engizildi. Túrkıa tarapynan oqý ornyna shashtaraz isine arnalǵan jabdyqtar, qural-saımandar men parfúmdik materıaldar qamtamasyz etildi. Ankaranyń eń bilikti shashtaraz sheberleri jyl boıy oqýshylarǵa pedagogıkalyq kásibı sheberlik qupıalaryn úıretti.
Sonymen qatar, Qazaqstan– German úkimetaralyq kelisimi sheńberinde lıseıde nemis ultynan 130 adam «Qonaqúı jáne meıramhana isiniń mamany» mamandyǵyn meńgerdi. Olar búginde Qazaqstanda ǵana emes, Germanıada da qonaqúı jáne meıramhana bıznesi salasynda jemisti eńbek etip júr.
Kolej shet memlekettermen de tyǵyz baılanysta. Máselen, «Shyǵys-Batys: qonaqjaılylyq dástúrlerin baıytý» jobasyn Fransıanyń Syrtqy ister mınıstrligi qarjylandyrdy. Lıseıdiń tórt qyzmetkeri Parıj qalasyndaǵy «Bılár» kásiptik lıseıinde qonaqúı jáne meıramhana isi boıynsha taǵylymdamadan ótti.
Sonymen qatar, Parıj qalasynyń Kásiptik lıseıindegi áriptester qonaqúı jáne meıramhana bıznesi mamandaryn daıarlaýdyń ınovasıalyq tehnologıalary boıynsha «Sheberlik synyby» nysanynda aptalyq sabaqtar ótkizip turady.
Biz elimizdegi 180 úzdik kolledj qatarynda «Jas maman» baǵdarlamasyna qatystyq. Búginde baǵdarlama aıasynda «Tamaq tehnologıalary» biliktilik ortalyǵy ashylyp, ol eń zamanaýı jabdyqtarmen jabdyqtaldy. Qazirgi tańda qalalyq, respýblıkalyq jáne halyqaralyq kásibı sheberlik konkýrstaryn ótkizýge arnalǵan alańǵa aınalyp otyr. Kolejdiń bilim alýshylary óńirlik deńgeıde 7 quzyret boıynsha qatysady: «Aspaz isi», «Kondıter isi», «Meıramhana servısi», «Vızýaldy merchendaızıng jáne vıtrınıstıka», «Gıd-ekskýrsovod», «Qonaqúılerdi basqarý», «Naýbaıhana sheberligi» jáne osy baǵdarlarda birneshe márte jeńimpaz atandy.
Budan bólek, oqý orny Samarqand týrızm jáne servıs tehnıkýmymen, «Caspian Center»-men (Túrkıa Respýblıkasy), NIKOLAOS Barı qorymen (Italıa), «Ortalyq Azıadaǵy kásiptik bilim berý (RESA)» (Germanıa) uıymymen Shveısarıada oqý baǵdarlamasy boıynsha yntymaqtastyq sheńberinde «Dýaldy kásiptik bilim berý júıesin odan ári damytý tujyrymdamasyn» qabyldap, «Kásiptik standarttar negizinde dýaldy halyqaralyq taǵylymdamadan ótti.
Ótken oqý jylynan bastap Almaty qalasy ákimdiginiń qaýlysymen jergilikti Bilim basqarmasynyń «Almaty tehnologıalyq koleji» bolyp ataldyq. Búgingi tańda kolejde voleıbol, fýtbol, basketbol, ústel tenısi seksıalary, sondaı-aq bı úıirmeleri, «Jasyn», «Aspazdyq is», «Mıksologıa», «Barısta» jáne shahmat úıirmeleri uıymdastyrylyp, volonterlik qyzmetke oqýshylardyń jartysynan astamy tartyldy. «Ashyq júrek» eriktiler klýby, «Jas sarbaz» áskerı-patrıottyq klýby, qyzdarǵa arnalǵan «Syrgalym» klýby bar.
Sheteldik seriktes kompanıalarmen jáne uıymdarmen belsendi yntymaqtastyq, halyqaralyq baılanystar men áriptestikti damytý baǵdarlary aıasynda kolej álemdik bilim berý keńistigine tanymal bilim ordasyna aınaldy. Bilim berý baǵdarlamalary barlyq kásibı standarttar men jumys berýshiniń talaptaryn eskere otyryp ázirlengen.
Biz árdaıym eńbek naryǵynyń ózgermeli jaǵdaılaryna saı, bolashaqta qaıta oqytýdy talap etpeıtin, tek eńbek jaǵdaılarynyń ózgerýi men jańa tehnologıalardy engizý faktisi boıynsha biliktilikti arttyrýdy ǵana qajet etetin kadrlardy daıyndaımyz. Qazirgi naryq talabyn basty baǵdar etip, servıs jáne tamaq tehnologıalary salasynyń eń qajetti mamandyqtaryn daıyndaımyz. Bul úshin oqytýdyń ıkemdi ádisterin qoldanamyz, dýaldy oqytýdy jáne kásiporyndardyń ótinimderi boıynsha oqytýdy keńinen paıdalanamyz. Jyl saıyn kolejdiń 400-ge jýyq túlegi eńbek naryǵyna aralasyp, kásibı kadr nemese JOO stýdenti men jas kásipker atanady.