QR Eńbek jáne halyqty áleýmettik qorǵaý vıse-mınıstri Oljas Anafın Úkimette ótken baspasóz konferensıasynda tabysy az qazaqstandyqtarǵa kórsetiletin memlekettik áleýmettik qoldaý sharalary týraly aıtty. Mundaı sanattaǵy azamattarǵa komýnaldyq qyzmetterdi óteýge turǵyn úı jáne áleýmettik kómek pen otbasyn qıyn ómirlik jaǵdaıdan shyǵarýǵa baǵyttalǵan ataýly áleýmettik kómek kórsetiledi.
Turǵyn úı kómegi komýnaldyq qyzmetterdi tóleýge, turǵyn úıdi kútip ustaýǵa arnalǵan shyǵystary jergilikti ókildi organdar belgilegen osy maqsattarǵa arnalǵan shyǵystardyń ruqsat etilgen shekti úlesinen asatyn azamattarǵa kórsetiledi. Shekti ruqsat etilgen úlestiń mólsheri 10%-dan aspaıdy.
Kómektiń bul túri tek bir turǵyn úıi bolǵan jaǵdaıda jergilikti búdjet qarajaty esebinen áleýmettik mártebesine qaramastan usynylady.
Turǵyn úı kómegin kórsetýge ótinishti elektrondyq úkimet portaly (egov.kz) nemese halyqqa qyzmet kórsetý ortalyqtary arqyly berýge bolady.
«2024 jyly jergilikti atqarýshy organdar jalpy somasy 592 mln teńgege 17,5 myń otbasyna nemese 41,2 myń adamǵa turǵyn úı kómegin kórsetti. Osy jyly jergilikti búdjetterden turǵyn úı kómegin tóleý úshin 41,9 myń alýshyǵa 1,5 mlrd teńge qarastyrylǵan», – dedi Oljas Anafın.
Qosymsha komýnaldyq qyzmetterge aqy tóleýge jáne jergilikti búdjetterden qatty otyn satyp alýǵa azamattardyń jekelegen sanattaryna birjolǵy jáne aı saıyn áleýmettik tólemder usynylady. Alýshylar sanattarynyń tizbesin, áleýmettik kómektiń shekti mólsherin jáne oǵan júginý merzimderin jergilikti atqarýshy organdar belgileıdi jáne jergilikti ókildi organdardyń sheshimderimen bekitiledi.
«Bul tólemder barlyq óńirlerde qarastyrylmaǵan jáne ol jergilikti búdjetterdiń múmkindikterine baılanysty bolady. 2024 jyly bul maqsattarǵa 181,2 myń alýshy úshin 5,3 mlrd teńge baǵyttaldy. Jergilikti atqarýshy organdardyń derekteri boıynsha 2025 jyly azamattardyń jekelegen sanattaryna áleýmettik kómek tóleýge 193,7 myń alýshy úshin 2,6 mlrd teńge qarastyrylǵan.
Belgilengen krıterıılerge sáıkes azamat bir mezgilde turǵyn úı kómegi men áleýmettik tólem ala alatynyn atap ótý mańyzdy», – dedi Oljas Anafın.
Jan basyna shaqqandaǵy ortasha tabysy kedeılik sheginen tómen (óńirlik medıandyq kiristiń 35%-y, biraq óńirlik eń tómen kúnkóris deńgeıiniń 70%-nan kem emes) tabysy az otbasylar úshin ataýly áleýmettik kómek (budan ári – AÁK) kórsetiledi.
«Tarıfter kóterilgen kezde baǵanyń ósýi eń tómengi kúnkóris deńgeıiniń azyq-túlik emes bóligine (55% azyq-túlik, 45% azyq-túlik emes bóligi) áser etedi. Osylaısha, komýnaldyq qyzmetter qunynyń ósýi kúnkóris deńgeıiniń joǵarylaýyna jáne sáıkesinshe AÁK mólsherine áser etetin kedeılik sheginiń ózgerýine ákeledi.
Eńbek jáne halyqty áleýmettik qorǵaý mınıstrligi bul ózgeristerge daıyn. Tabysy kedeılik sheginen tómen barlyq qazaqstandyqtarǵa ataýly áleýmettik kómek kórsetiletin bolady. 2024 jyly AÁK tóleýge 78,1 myń otbasynyń 413,7 myń múshesi úshin 39,5 mlrd teńge jumsalsa, bıyl bul maqsattarǵa 1 mln adamǵa 132,9 mlrd teńge qarastyrylǵan», – dep atap ótti Oljas Anafın.
Buryn habarlanǵandaı, AÁK-tiń negizgi maqsaty – aqshalaı tólemder túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn ómirlik qıyn jaǵdaıdan shyǵarý.
AÁK mynalardy kózdeıdi:
- tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;
- bir jastan bastap alty jastaǵy balalary bar tabysy az otbasylardyń ár balasyna 1,5 AEK mólsherinde aı saıynǵy qosymsha tólem berý;
- jumysqa ornalasý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne t. b. arqyly jumyspen qamtýǵa járdemdesý.
Qazirgi ýaqytta qazaqstandyqtar AÁK taǵaıyndaýǵa ótinishti Mansap ortalyǵyna, turǵylyqty jeri boıynsha aýyldyq okrýg ákimine nemese elektrondyq úkimet portaly (egov.kz) arqyly bere alady.