Narynqoldyq 50 otbasy úıli boldy.
Aqıyq aqyn Muqaǵalı Maqataevtyń 90 jyldyq mereıtoıy aıasynda, Narynqolda 50 úıdiń kilti berilip, aqynǵa arnalǵan eskertkishtiń ashylý saltanaty ótti, dep habarlaıdy Almaty-akshamy.kz Almaty oblysy ákimdiginiń baspasóz qyzmetine silteme jasap.
Kóptiń qýanyshyn bólisýge, QR memlekettik hatshysy Qyrymbek Kósherbaev, QR mádenıet jáne sport mınıstri Aqtoty Raıymqulova, Almaty oblysynyń ákimi Amandyq Batalov arnaıy keldi. Ólkedegi qýanyshty jaıyttyń biri, 50 otbasynyń baspanaly bolýy . Solaısha, el Táýelsizdiginiń 30 jyldyǵy men muzbalaq aqynnyń mereıtoıynda narynqoldyq aǵaıyn qonys toıyn toılady.
Turǵyn úı kiltterin tabystaý rásiminde sóz alǵan Qyrymbek Kósherbaev, Raıymbek aýdanynyń qaıta túlegenin kórip, ólkeniń ary qaraı damýyna tilektestigin jetkizdi.
«Táýelsizdik eleń alǵan ýaqytta Narynqolda qıynshylyq kezeńderi ótti. Biraq, Elbasynyń sheshimine sáıkes, Raıymbek aýdany qaıta qalpyna keldi. Arytnsha kezinde kóship ketken 2,5 myń halyq týǵan jerine qaıtyp oralyp, óńirdegi tirshilik jandana tústi.
Osynyń bári, táýelsizdiktiń arqasy. Oblys ákimi Amandyq Batalovqa da alǵys aıtqym keledi. Óńir jaınap, óse bersin.
Narynqoldyń jaqsaryp jatqanyn kórgenimizge qýanyshtymyz. Búgin úı alyp jatqan otbasylar úshin erekshe kún. Barshalaryńyzdy qonys toımen quttyqtaımyn»,- dedi QR memlekettik hatshysy Qyrymbek Kósherbaev.
Jalpy aýdany 4961 sharshy metr. Mereke kúni jeke turǵyn úıdiń kilti, 7 januıaǵa resmı túrde tabystaldy. Ár úıdiń aýdany-100 sharshy metr.
Jeriniń kólemi-10 sotok. Turǵyn úıde 3 bólmemen qatar, as úı, ájethana, jýynatyn oryn qarastyrylǵan. Tipti, ystyq jáne sýyq sýy da tartylǵan. Barlyǵy jańa, sapasy jaqsy, talapqa saı. Zamanaýı baspanany «Gýnn Stroı Servıs» salsa, nysannyń jobasyn «ElM» kompanıasy jasaǵan. Negizinen úıdiń qurylysyna 1,1 mlrd.teńge bólingen.
Qos mereke qatar kelgen turǵyndardyń qýanyshynda shek joq. Solardyń biri, aýyl turǵyny, kóp balaly ana Madına Júkeeva.
«El táýelsizdiginiń 30 jyldyǵy, Muqaǵalı Maqataevtyń 90 jyldyǵy aıasynda baspanaly bolyp jatyrmyz. Balalarym máre-sáre bolyp júr. Qýanyshymyzda shek joq. Osnydaı baqytty sezinýge múmkindik bergen memleketimizge alǵys aıtamyn. Úıimiz óte jaqsy, ózimizge unap jatyr»,- dedi Madına Júkeeva.
Dúbirli toıdyń sheńberinde qonys toıyn toılaǵandardyń qatarynda Beglan Sákende bar.
«Raıymbek aýdanynyń týmasymyn. Aýdandyq ákimdiktiń apparatynda qyzmet atqaramyn. Máýskeýde bilim alyp keldim. Aýdanymyzda jastarǵa qoldaý kóp kórsetiledi. Oǵan ózderińizde kýá bolyp otyrsyzdar. Búgin jas mamandarǵa úıdiń kiltin tabystady. Solardyń qatarynda ózimde barmyn. Qutty shańyraqqa ıe bolyp, shat-shadyman kúıge enip turmyn»,- deıdi Beglan Sáken.
Sondaı-aq, aspantaýdyń asqarymen otty jyry teńesken, Muqaǵalı Maqataevtyń týǵan jerinde aqynǵa arnalǵan eskertkishtiń ashylý saltanaty oryn aldy. 90 jyldyq mereıtoıy aıasynda boı kótergen nysan, Narynqol aýylyndaǵy Raıymbek kóshesinen oryn tepti. Muzbalaq aqynnyń músininiń avtory Qazaqstannyń qurmetti sáýletshisi, Aqmyrza Rýstembekov bolsa, músinshisi, Qazaqstan Sýretshiler odaǵynyń múshesi, Sultan Beıbarys atyndaǵy syılyqtyń laýreaty Kakımov Qadyrhan bolyp tabylady.
Amandyq Ǵabbasuly shara barysynda, Muqaǵalıdiń ómirsheń óleńderi el esinde máńgi qalaryn tilge tıek etti.
«Raıymbek aýdanynyń tamyryna nár júrdi. Burynǵy kelbetin kórgende júregim aýyratyn. Elbasynyń qoldaýynyń arqasynda keıpin jańarttyq. Qasym-Jomart Toqaevta ólkeniń órkendeýine kóńil bólýde. 800-den astam otbasy kelip, aýdanda jumys jandandy óte qýanyshty jaıyt. Osydan 10 jyl buryn aqynnyń 80 jyldyq mereıtoıyn ótkizýge daıyndyqqa Narynqolǵa keldim 2 aı boıy osynda boldym. Aqyn shyǵarmashylyǵymen tanysqan soń onyń óleńderine ǵashyq boldym. Qazaq eli osyndaı talantty aqyndarǵa baı. Olardyń murasyn ulyqtaý urpaqqa paryz»,- dedi Amandyq Batalov.
Al uly tulǵanyń tuıaǵy Juldyz Maqataev asqar taý ákesiniń týǵan kúnin el-jurty umytpaı ulyqtap jatqanyna alǵysyn bildirdi.
«Kózi tiri bolsa 90 jasqa tolar edi. Ǵumyry uzaq bolǵanda budanda kóp jalyndy jyr qaldyratynyna shúbá joq. Qysqa ǵana ómirinde tirshiliktiń tetigi men ketigi jaıly jazyp ketti. Qazaq poezıasyna erekshe qoltańbasyn qaldyrdy. Osyny elep-eskerip, arnaıy sharalar uıymdastyryp jatqandaryńyzǵa alǵys bildiremin. Ákemizdiń arýaǵy sizderdi qoldap júrsin», - dep qorytyndylady aqynnyń uly.
Eskertkishtiń jalpy quny-61,1 mln.teńge. Nysannyń uzyndyǵy-8,02 m. Músindi «Taıqazan»JSHS jasap shyǵarǵan. Muqaǵalı Maqataevqa arnap salynǵan eskertkish eki bólikten turady: sulbasy men jazýy bar qulpytas. Aıta keteıik, aqyn beınesi - qoladan, jazýǵa arnalǵan bóligi granıtten jasalǵan. Sulbasynyń uzyndyǵy-3,87 m. Al postamenttiń bıiktigi - 4,15 metrdi quraıdy.
Aıta keteıik, Maqataevtyń eskertkishi ornalasatyn alańda abattandyryldy. Atalǵan jumysqa oblystyq búdjetten 70,1 mln. teńge bólinip, jumystar aıaqtaldy. Jeriniń kólemi - 0,30 ga. Aýmaq tolyqtaı kógaldandyrylyp, jaryq shamdary ornatylyp, sýǵarý júıesi júrgizildi, kishi sáýlettik keseneler ornatyldy.
Muzbalaq aqyn Muqaǵalı Maqataevtyń 90 jyldyq torqaly toıynyń sheńberinde uıymdastyrylǵan is-sharalardyń barysynda, QR memlekettik hatshysy Qyrymbek Kósherbaev, QR mádenıet jáne sport mınıstri Aqtoty Raıymqulova, Almaty oblysynyń ákimi Amandyq Batalov aýdan ortalyǵy Narynqol aýylyndaǵy 180 oryndyq dene shynyqtyrý-saýyqtyrý keshenine bas suqty. Ǵımarattyń aýdany - 4800 sharshy metr. Nysan eki qabattan turady. Munda voleıbol, basketbol, gandbol, shaǵyn fýtbol syndy komandalyq oıyndarǵa arnalǵan jáne kúres, boks pen jattyǵý zaldary bar. Jattyqtyrýshylarǵa arnalǵan jáne medısınalyq, massaj kabınetteri de qarastyrylǵan. 4 kıim aýystyratyn bólme, 32 oryndyq asqana, sonymen qatar, toǵyz qumalaq, doıby shahmat, ústel tenısine arnaıy oryndar da jabdyqtalǵan. Qurylys jumystaryn «FÝD MS» JSHS júrgizgen. Esterińizge salamyz, sport kesheni aǵymdaǵy jyly 14 maýsym kúni qoldanysqa berilgen bolatyn.