Baıqońyr – adamzat úshin ǵarysh ıgerýdiń besigi.
Venanyń Tehnıkalyq mýzeıinde Qazaqstannyń Aýstrıadaǵy Elshiligi Aýstrıanyń kólik, ınovasıa jáne tehnologıa mınıstrliginiń qoldaýymen quramyna ǵaryshker Toqtar Áýbákirov, aýstrıalyq ǵaryshker Frans Fıbek jáne ekıpaj komandıri Aleksandr Volkov kirgen «Avstromır» atty ǵarysh ekspedısıasynyń 30 jyldyq mereıtoıyn merekeleýge arnalǵan is-shara ótti, dep habarlaıdy Almaty-akshamy.kz QR Syrtqy İster mınıstrligine silteme jasap.
Qazaqstan táýelsizdiginiń mereıtoıy jylynda eńbek sińirgen synaýshy-ushqysh, Keńes Odaǵynyń Batyry Toqtar Áýbákirov ǵarysh keńistiginde bolǵan qazaq halqynyń alǵashqy ókili atalǵanyna da 30 jyl tolady. Osy erligi úshin ol «Halyq Qaharmany» ataǵyna ıe boldy.
1991 jyldyń 2 qazany ǵaryshqa tuńǵysh ret otandastaryn jibergen eki el – Qazaqstan men Aýstrıa úshin tarıhı kún boldy.
Qazaqstannyń Tuńǵysh Prezıdenti Nursultan Nazarbaevtyń shaqyrýymen Baıqońyr ǵarysh aılaǵyna kóptegen odaqtas respýblıkalardyń basshylary jáne Aýstrıa kansleri Frans Vranıskıı ushyp keldi.
Venada ótken is-sharaǵa Aýstrıanyń Kólik, ınovasıa jáne tehnologıa Federaldy mınıstri Leonora Gevessler, aýstrıalyq ǵaryshker Frans Fıbek, (beınebaılanys arqyly) qazaqstandyq ushqysh-ǵaryshker Toqtar Áýbákirov, Vena tehnıkalyq mýzeıiniń bas dırektory, sondaı-aq ǵaryshkerlik salasyndaǵy ǵalymdar men zertteýshiler qatysty.
Paneldik sesıa barysynda qatysýshylar ǵaryshqa daıyndyq, ushý, bolý tarıhymen bólisip, ǵarysh salasynyń eń ózekti máselelerin, onyń ishinde zamanaýı ǵarysh qyzmetiniń qıyndyqtary men ǵarysh zertteýleriniń perspektıvalaryn talqylady.
Óziniń beıne úndeýi aıasynda T. Áýbákirov aýstrıalyqtardy jáne óziniń áriptesi, jaqyn dosy F. Fıbekti ekspedısıa kúniniń mereıtoıymen quttyqtap, Baıqońyr qalasynda ótken daıyndyq, ekıpajben uzaq ǵumyr keshken berik dostyq pen ǵaryshqa shyǵaryp salý týraly jyly estelikterimen bólisti. Sondaı-aq, halqymyzdyń qonaqjaılylyǵy men aqkóńildigin erekshe atap ótip, aýstrıalyqtardy Qazaqstanǵa kelýge shaqyrdy.
Qazaqstannyń Venadaǵy Elshisi Qaırat Omarov óziniń quttyqtaý sózinde «T. Áýbákirovtiń ushýy halqymyz úshin erekshe maqtanyshqa aınalyp, Qazaqstannyń memlekettik táýelsizdik alýymen qatar júrgen ulttyq sana-sezimniń qýatty serpilisiniń bir bóligi boldy. Bul ushý elimizdiń ǵaryshty ıgerýdegi aıryqsha róliniń kórinisi de boldy, sebebi Jer orbıtasyna barlyq álemdik ushyrýlardyń jartysynan kóbin qamtamasyz etken Baıqońyr – adamzat úshin ǵarysh ıgerýdiń besigi», - dedi.
Qazaqstandyq ǵaryshkerlerdiń jetistikteri táýelsizdigimizdiń alǵashqy kezeńinde halqymyzdyń rýhyn kóterip, tereń zerdelenip, este saqtalýy tıis elimizdiń jańa tarıhynyń aınymas bóligine aınaldy. Qasym-Jomart Toqaev óziniń «Táýelsizdik bárinen qymbat» atty maqalasynda dál osy fılosofıany – tarıhty tanyp, halyqaralyq arenada óz jetistikterimen Qazaqstannyń ataǵyn shyǵarǵan azamattardy bilý dep atap kórsetedi.
Jarıalanǵan kúni