qutqarýshylar barlyq qurmetke laıyq
19 qazan – Qutqarýshylar kúni. 1995 jyly Memleket basshysynyń Jarlyǵymen qurylǵan arnaıy qyzmet kúni búginge deıin halyqqa qaltqysyz eńbek etip keledi.
Aty aıtyp turǵandaı, kásibı mereke ıeleriniń eń basty mindeti – tosynnan bolǵan apat kezinde azamattarǵa birinshi bolyp kómek kórsetý, adam ómirin qutqarý. Shyntýaıtynda, ózgeniń ómiri úshin óziniń basyn qaterge tigý ekiniń biriniń qolynan kele bermeıdi. Mundaı jaýapkershilikti alý úshin adamǵa úlken júrek, mashyq, bilim men bilik jáne tájirıbe kerek.
Endeshe, ózgeniń ómirin saqtaý úshin óz janyn shúberekke túıip qyzmet etip júrgen azamattarymyzdyń eńbegi barlyq qurmetke laıyq.
Qutqarýshylardyń kásibı merekeleri qarsańynda Almaty qalasy Tótenshe jaǵdaılar departamentiniń Órt sóndirý jáne avarıalyq-qutqarý jumystary qyzmetiniń №1 mamandandyrylǵan órt sóndirý bóliminiń órt sóndirýshi-qutqarýshysy Ádil Erkinuly Dáýrenqulovtan jalpy tótenshe jaǵdaı týyndaǵanda atqaratyn jumystary jaıynda suradyq.
MAMANDYǴYM - MAQTANYSHYM
Taraz qalasyna jaqyn Qumshaǵal aýylynyń týmasymyn. Jasym – 27-de. Bala kezimnen órt sóndirýshi bolýdy qaladym. Keıin mektep bitirgennen keıin QR Tótenshe jaǵdaılar mınıstrliginiń Kókshetaý tehnıkalyq ınstıtýtyna oqýǵa túsý armanym bolatyn. Biraq ol jyly UBT-dan óte almadym, jolym bolmady. Keıin shaqyrtý alǵan soń Otan aldyndaǵy boryshymdy óteýge áskerge attandym. Áskerden kelgennen keıin Taraz qalasyndaǵy «Ǵasyr» kolejine oqýǵa túsip, zańger mamandyǵyn aldym. 2018 jyly qazir eńbek etip júrgen №1 mamandandyrylǵan arnaıy bólimge órt-sóndirýshi bolyp jumysqa ornalastym. 6 jyldan beri osy mekemede abyroıly eńbek etip kelemin. Ujym saıdyń tasyndaı myqty jigitterden quralǵan. Barlyǵymyz birge as iship, keıde, tipti birge uıyqtaımyz da. Bir-birimizge syılymyz. Áriptesterimnen úırengenim de, áli de úırenerim kóp.
Ózderińiz bilesizder, órt sóndirýshilerdiń ár kúni qaýip pen qaterge toly. Soǵan qaramastan qyzyl jalynmen arpalysýǵa daıyn turamyz. Sebebi, bul bizdiń mindetimiz. Jazym degen taban astynda ǵoı... Birde Rozybakıev pen Sátbaev kósheleriniń qıylysyndaǵy «Bekker» degen saýda ortalyǵynda órt shyqqany týraly habar keldi. Biz «sol ǵımarattyń shatyryn ashyp, shatyrdyń astynan sý shashyńdar» degen buıryq aldyq. Oqıǵa ornyna jyldam jettik. Biraq, shatyrdyń ústine jyldam shyǵamyn dep aıaǵym taıyp ketip, laýlaǵan qyzyl jalynnyń ortasyna bir-aq túskenim bar. Kórer jaryǵym bar eken, áıteýir aman qaldym. Sol kez áli kúnge deıin esimnen ketpeıdi. Taýly aımaqtarda da qaýip kóp. Máselen, shyrsha janyp, ústińe qulap ketýi múmkin. Adam ómirin ajaldan aralashaý, qıyn sátte kómek qolyn sozý, olarǵa qaıta ómir syılaý degen erekshe sezim. Eńbegimizdi baǵalaǵandyqtyń belgisi bolar, keıde bizdi halyq arasynda «beıbit kúnniń batyrlary» dep qurmet kórsetip, kishkentaı balalar bizben sýretke túsip jatqanda, mamandyǵyma degen qurmetim arta túsedi. Osylaısha kóptiń alǵysyna bólenip eńbek etip kelemiz. Qazir jalaqymyz kóterilip, jaǵdaıymyz jaqsara tústi. Men óz mamandyǵymdy súıemin!
