«Maıster-zal» sahnasynda elimizdiń atynan mańǵystaýlyq ártister óner kórsetken.
Nemis tyńdarmandary «Aqshaǵyl» jáne «Jorǵa» ansámblderiniń mýzykalyq sheberligine tánti boldy. Jetigen, dombyra, dabyl, qylqobyz. Merekelik keshti ashqan «Aqshaǵyl» etno-folklorlyq ansambli nemis tyńdarmanyn tańdaı qaqtyrdy, dep habarlaıdy Almaty-akshamy.kz 24.kz-ke silteme jasap.
Sebebi, ár ónerpaz atalǵan 5 aspapta oınaı alady. Ansámbl quramynda Qurmanǵazy atyndaǵy ulttyq konservatorıa túlekteri de bar. Uly dalanyń ǵajaıyp áýeni alǵashqy notalardan-aq tyńdarmanyn baýrap aldy.
«Keremet konsert boldy. Kózimdi jumǵan kezde men ózimdi Qazaqstannyń keń baıtaq dalasynda júrgendeı sezindim. Aspaptar shynaıy atmosferany jetkize bildi. Elderińizdi Respýblıka kúnimen shyn júrekten quttyqtaımyn! Qazaqstanǵa serpindi damý tileımin»! - deıdi Býndestag depýtaty Katrın Býdde.
Shırek ǵasyrdan beri sahnada tórinde júrgen aqtaýlyq «Jorǵa»ansambli qazaqtyń bekzada bı ónerin pash etti. Kórermender qatarynan Býndestag depýtattary, kásipkerler, tipti, Germanıanyń eks-prezıdenti Horst Keler de kórindi.
«Mýzykanttar men bıshiler qazaq mádenıetin tolyq jetkize aldy. Men atqa mingen shabandozdar, jabaıy ańdar men ańshylardy kórgendeı áserde boldym. Sondaı-aq, qazaqtyń úılený toıyna baryp kelgendeı boldyq. Osyndaı konsertterdiń, ónerpazdardyń arqasynda biz Qazaqstan týraly kóbirek bile túsemiz. Sizderdi Respýblıka kúnimen quttyqtaımyn jáne ósip-órkendeý tileımin»! - Germanıanyń Federaldy Prezıdenti (2004-2010 j.j.) Horst Keler.
«Bul erekshe kesh boldy. Ár túrli aspap pen mýzykanttardyń sheberligi meni tań qaldyrdy. Ǵajap konsert boldy! Qurmanǵazy, Dáýletkereı, Nurǵısa darabozdardyń jáne Sebastán Bahtyń ólmes týyndylary oınaldy. Dál osyndaı konsert Múnhen men Frankfýrt qalalarynda da ótedi», - deıdi Tómengi Saksonıadaǵy QR qurmetti konsýly Gúnter Papenbýrg.