Almatyda ańyz tulǵalar «tirildi».
Ótken túnde megapolıs mýzeıleri teatrlandyrylǵan qoıylymdar men performanstar arqyly jandy tarıh keńistigine aınaldy. Qonaqtardy qazaq jazýynyń reformatory Ahmet Baıtursynuly, Vernyı qalasynyń alǵashqy bas jospar avtory, sáýletshi Pol Gýrde, tuńǵysh qazaq ınjeneri Muhamedjan Tynyshpaev, kórnekti geolog Qanysh Sátpaev, opera ánshisi Ermek Serkebaev jáne álemge áıgili ánshi Roza Baǵlanova beınesindegi artıser qarsy aldy. Sonymen qatar, halyq kompozıtorlary Qurmanǵazy, Qorqyt, Birjan sal, Dına Nurpeıisova, Jambyl Jabaev, Aqan seri jáne belgili jazýshylar Sábıt Muqanov pen Ǵabıt Músirepovtiń beıneleri de usynyldy. Qonaqtar Qazaqstannyń ulttyq murasy – «Altyn adam» beınesindegi úlken qýyrshaqtarǵa erekshe qyzyǵýshylyq tanytty.
«Mýzeı túni – 2025» aksıasy aıasynda Almaty tarıhy mýzeıi, Yqylas atyndaǵy halyq mýzykalyq aspaptar mýzeıi, Ahmet Baıtursynulynyń mýzeı-úıi, D. A. Qonaev mýzeıi, Mýltımedıalyq dástúrli mýzyka ortalyǵy, S. Muqanov pen Ǵ. Músirepovtiń ádebı-memorıaldyq mýzeılerin 20 myńnan astam adam tamashalady.
Almaty tarıhy mýzeıinde performanstan bólek «Almaty – mahabbatym» spektakli, arheologıa men áıel beınelerine arnalǵan dárister, sondaı-aq, Nurǵısa Tilendıevtiń 100 jyldyǵyna arnalǵan múzıkl qoıylymy kópshiliktiń erekshe yqylasyna bólendi. Keshtiń sońy ashyq aspan astyndaǵy kıno kórsetilimi men kvest jeńimpazdaryn marapattaý rásimimen aıaqtaldy.
Ahmet Baıtursynulynyń mýzeı-úıinde alashtanýshylardyń dáristeri men «Alash» qozǵalysy qaıratkerlerine arnalǵan teatrlandyrylǵan qoıylym ótti. Sábıt Muqanov pen Ǵabıt Músirepovtiń ádebı mýzeılerinde spektáklder, vıktorınalar jáne jazýshylarmen kezdesýler uıymdastyryldy. Kórermender «Móldir mahabbat» jáne «Qyz Jibek arıasy» qoıylymdaryn tamashalady. Mýltımedıalyq dástúrli mýzyka ortalyǵynda Abaı Qunanbaevtyń 180 jyldyǵyna arnalǵan konsert pen «Bes asyl is» taqyrybyndaǵy dáris ótti, sondaı-aq, Shámshi Qaldaıaqovtyń mandolınasy sekildi sırek eksponattar kórmege qoıyldy.
«Barshańyzdy Halyqaralyq mýzeı kúnimen quttyqtaımyn. Búgin Almaty mýzeıleri turǵyndar men týrıser keletin ortaǵa aınaldy – segiz mýzeıdiń árqaısysy mazmundy baǵdarlama usyndy. Ásirese, otbasylarymen, balalary men nemerelerimen kelgen jandardy kórip, erekshe qýandym. Bul urpaq sabaqtastyǵynyń, mádenıetke, óner men tarıhqa degen qyzyǵýshylyqtyń kórinisi. Jastar kvestke belsene qatysyp, suraq qoıyp, tarıhtyń beımálim betterin ashýda. Mundaı is-sharalar murany qurmetteýge, mádenıetti azamatty tárbıeleýge yqpal etedi», – dedi Almaty Mádenıet basqarmasynyń basshysy Ǵanı Maılybaev qalanyń mýzeıler birlestiginiń úzdik qyzmetkerlerin marapattaý barysynda.
Jalpy, keshki saǵat 18:00-den tún ortasyna deıin megapolıstiń segiz mýzeıinde ekskýrsıalar, qysh jáne beıneleý óneri boıynsha sheberlik dáristeri, mýzykalyq aspaptar jasaý, zıatkerlik oıyndar, jazýshylar men mádenıettanýshylarmen kezdesýler, sonymen qatar, Erkesh Hasen, Ernar Amandyq, «Alataý serileri» toby, «Jańa ǵasyr» teatry artıseri jáne t.b. tanymal ónerpazdardyń qatysýymen «Almaty keshi» konserttik baǵdarlamasy ótti.
Kesh sońynda barlyq alańda kvesttiń belsendi qatysýshylaryn marapattaý rásimi, merekelik konsertter men túngi kıno kórsetilimderi uıymdastyryldy. «Mýzeı túni» aksıasy teatr ónerin, mýzykany, ǵylym men tehnologıany biriktire otyryp, tarıhty árbir adamǵa qoljetimdi ári qyzyqty etti.
