Almatyda Qazaqstan Respýblıkasy Prezıdentiniń janyndaǵy Ulttyq ǵylym akademıasynyń bastamasymen Qazaqstan Respýblıkasy Oqý-aǵartý mınıstrligimen birlesip elimizde alǵash ret Jas zertteýshiler forýmy ótkizildi, dep habarlaıdy aqshamnews.kz
İs-sharaǵa Qazaqstan Respýblıkasynyń Oqý-aǵartý mınıstri Beısembaev Ǵanı Bektaıuly, QR Prezıdentinińjanyndaǵy Ulttyq ǵylym akademıasynyń akademıkteri, ákimshilikterdegi bilim basqarmalarynyń basshylary, jetekshi jas ǵalymdar, sondaı-aq elimizdiń ár óńirinen 400-den astam respýblıkalyq jáne halyqaralyq konkýrstardyń jeńimpazdary men júldegerleri atanǵan daryndy mektep oqýshylary jáne olardyń ǵylymı jetekshileri qatysty.
QR Prezıdentiniń janyndaǵy Ulttyq ǵylym akademıasynyń prezıdenti Kúrishbaev Aqylbek Qajyǵululy alǵy sózinde bolashaqta óz ómirin ǵylymı-zertteý jumysymen baılanystyrǵysy keletin, ǵylym jolyn tańdaýǵa qulshynys bildirgen elimizdiń barlyq jas talanttaryn búgingi Forýmnyń ashylýymen shyn júrekten quttyqtap, jemisti jumys tiledi.
Onyń aıtýynsha, QR Oqý-aǵartý mınıstrligi ókilderi, mektepter, akademıkter jáne Jas ǵalymdar keńesiniń múshelerimen birlesip akademıanyń basqarý qurylymy qalyptasyp, onyń qyzmeti bastalady.
Óz kezeginde Almaty qalasy Bilim basqarmasynyń basshysynyń orynbasary Aıdyn Saılaýbaı óz sózinde forým oqýshylardyń ǵylymı-zertteý jobalary men ázirlemelerin tanystyrýǵa arnalǵan ashyq alańǵa aınalǵanyn aıtty. Munda olardyń daıyndyq deńgeıi baǵalanyp, jetekshi ǵalymdar men sarapshylar tarapynan kásibı pikirler aıtyldy. Sonymen qatar, STEM bilimin damytý, halyqaralyq tájirıbeni orta bilim júıesine engizý jáne Qazaqstandaǵy mektep ǵylymynyń bolashaǵy sıaqty ózekti máseleler keńinen talqylandy.
«Almaty daryny» ortalyǵynyń dırektory Gýlnýr Karımgajy atap ótkendeı Almaty – bilim men ǵylymnyń ordasy. Qalada 300 myńnan astam oqýshy bar, olardyń arasynan júzdegen jas talanttar respýblıkalyq jáne halyqaralyq zıatkerlik jarystarda top jaryp keledi. Bul – ustazdardyń, mektepterdiń jáne eń bastysy, yntaly oqýshylardyń eńbeginiń nátıjesi.
Bıyl 33 oqýshy respýblıkalyq, al 29 oqýshy halyqaralyq ǵylymı baıqaýlarda júldeli oryndarǵa ıe boldy. Bul – bizdiń ortaq jeńisimiz!
Forýmda Almaty qalasynan tórt oqýshy óz jobalaryn usynyp, júldeli oryndarǵa ıe boldy, bul almatylyq oqýshylardyń joǵary deńgeıdegi daıyndyǵy men shyǵarmashylyq áleýetin rastaıdy.
Forým baǵdarlamasyna oqýshylardyń ǵylymı jáne ınovasıalyq jobalarynyń kórmesi, «Zıatker» atty ıntellektýaldyq komandalyq saıys, sondaı-aq akademık Q.I. Sátbaev atyndaǵy mýzeıge, arheologıa jáne Qazaqstan ǵylymynyń tarıhı mýzeılerine ekskýrsıalar kirdi. Jas zertteýshiler qurmetti aýdıtorıa aldynda baıandamalar men prezentasıalar jasady. Odan keıin Forým jeńimpazdaryn marapattaý rásimi ótti.