Qazaqtyń kórnekti aqyny Muhtar Shahanovtyń jubaıy, belgili ǵalym, pedagog Rozalında Áshirbaıqyzy Shahanova qaıtys boldy, dep habarlaıdy aqshamnews.kz.
1951 jyly Pavlodar qalasynda dúnıege kelgen Rozalında Shahanova Almatydaǵy Qazaq qyzdar pedagogıkalyq ýnıversıtetiniń (QyzPU) «Orys tili men ádebıeti» mamandyǵy boıynsha joǵary bilim alyp, kásibı eńbek jolyn mektep muǵalimi retinde bastaǵan. Keıin ǵylymǵa den qoıyp, 1990 jyly kandıdattyq dısertasıasyn sátti qorǵady.
1993 jyly «Qazaq tili men ádebıeti» mamandyǵy boıynsha ekinshi joǵary bilim alyp, sol jyly dosent ǵylymı ataǵyna ıe boldy. Onyń ǵylymı jáne ádistemelik eńbekteri elimizdiń bilim berý júıesinde keńinen qoldanylyp keledi.
2004 jyly QyzPU oqý ornyna oqý-ádistemelik jumys jónindegi prorektor qyzmetine shaqyrylyp, bul laýazymdy 2008 jylǵa deıin atqardy. Ol ózine ǵylym jolyn ashqan ýnıversıtetpen ómiriniń sońyna deıin tyǵyz baılanysta bolyp, jyl saıyn memlekettik emtıhan komısıasynyń tóraǵasy retinde stýdentterdiń bilimin baǵalaýǵa atsalysty.
Rozalında Shahanova – kóptegen ǵylymı maqalalar men oqý-ádistemelik quraldardyń avtory. Ol «QR Bilim berý isiniń úzdigi», «Joǵary oqý ornynyń úzdik oqytýshysy», «Y. Altynsarın» medali, «Ǵylymnyń damýyna qosqan úlesi úshin» tósbelgisi jáne QyzPU damýyna qosqan úlesi úshin berilgen «Qurmet» medali syndy marapattarǵa ıe bolǵan.