Mádenıet jáne aqparat mınıstrligi tarıhı teatrlardy qalpyna keltirý jáne jańǵyrtý boıynsha aýqymdy jumystardy jalǵastyrýda.
Sonyń ishinde Muhtar Áýezov atyndaǵy Qazaq ulttyq drama teatry da bar, dep habarlaıdy aqshamnews.kz.
Mádenıet jáne aqparat mınıstrliginiń baspasóz qyzmeti taratqan aqparatqa saı, teatr ǵımaraty salynǵannan beri kúrdeli jóndeýden ótpegen. Injenerlik jelileri men materıaldyq-tehnıkalyq bazasy tozǵandyqtan órt qaýpi joǵary. Ǵımarat rekonstrýksıasy teatrdyń tarıhı kelbetin saqtaı otyryp júrgiziledi. Óıtkeni ǵımarat jergilikti mańyzy bar mádenı eskertkish mártebesine ıe.
Sonymen qatar, demeýshiler qarajatymen Abaı atyndaǵy Qazaq ulttyq opera jáne balet teatry ǵımaratynda ishki jóndeý jumystary júrgizilýde. Qazirdiń ózinde jeti bólme, onyń ishinde orkestr men hor zaldary, mýzeı, grım bólmeleri, qabyldaý zaly jáne t.b. jańartyldy.
Natalıa Sas atyndaǵy memlekettik akademıalyq orys balalar men jasóspirimder teatrynda da kóp ózgeris bolady. Ǵımarattyń kúrdeli jóndeý boıynsha jobalyq-smetalyq qujattamasy memlekettik saraptamadan ótip jatyr.
Respýblıkalyq akademıalyq nemis drama teatry da nazardan tys qalmaıdy. Burynǵy kınoteatr ǵımaratynda ornalasqan teatrdy jóndeý jáne gazdandyrý máselesi Ulttyq ekonomıka mınıstrliginiń qaraýynda tur.
Mınıstrlik sonymen qatar 2025 jyly Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynyń ǵımaratyna saraptama júrgizýdi josparlap otyr. Saraptama barysynda onyń kúrdeli jóndeý jumystary boıynsha aldaǵy jumys kólemi anyqtalady.
Aıta ketý kerek, 2020 jyly elimizdiń mádenı murasyn qoldaýdaǵy mańyzdy qadam –Q.Qojamıarov atyndaǵy Respýblıkalyq memlekettik akademıalyq uıǵyr mýzykalyq komedıa teatrynyń kúrdeli jóndeý jumystarynyń aıaqtalýy.