Bul ony kórsetý merzimin 1 jumys kúnine deıin qysqartýǵa múmkindik berdi.
Eńbek jáne halyqty áleýmettik qorǵaý mınıstrligi «Múgedektigi boıynsha memlekettik áleýmettik járdemaqyny taǵaıyndaý» memlekettik qyzmetin proaktıvti kórsetý kezinde adamı faktordy tolyǵymen alyp tastady, dep habarlaıdy Almaty-akshamy.kz Elorda.info-ǵa silteme jasap.
Buǵan deıin bul qyzmet «Azamattarǵa arnalǵan úkimet» memlekettik korporasıasy» KEAQ qyzmetkerleriniń qatysýymen kórsetilgen jáne ony kórsetý merzimi 8 jumys kúnin quraǵan. Osy jyldyń aqpan aıynda atalǵan járdemaqyny taǵaıyndaý týraly ótinishti qaraý avtomattandyryldy, bul 4 jumys kúni ishinde qyzmet kórsetýge múmkindik berdi.
Kelesi kezeń adamı faktordy tolyǵymen alyp tastaý boldy – mamyr aıynyń basynan bastap múgedektigi boıynsha áleýmettik járdemaqyny taǵaıyndaý Eńbek mınıstrliginiń aqparattyq júıeleri arqyly júrgiziledi, bul qyzmet kórsetý merzimin taǵy 1 jumys kúnine deıin qysqartýǵa múmkindik berdi.
Jańa jeńildetilgen tártipti 244 kórsetiletin qyzmetti alýshy paıdalandy.
Qyzmetti proaktıvti formatta 1414 bir ǵana SMS-habarlamasyna jaýap berý, járdemaqyny proaktıvti resimdeýge kelisim berý jáne bank shotyn rastaý arqyly alýǵa bolady. Qyzmet kórsetý úshin barlyq qajetti málimetter memlekettik organdardyń aqparattyq júıelerinen kelip túsedi.
Esterińizge sala keteıik, naýryz aıynda dál osyndaı qaǵıda boıynsha «Altyn alqa» nemese «Kúmis alqamen» marapattalǵan analarǵa járdemaqy taǵaıyndaý avtomattandyryldy, bul qyzmet kórsetý merzimin 1 jumys kúnine deıin qysqartýǵa múmkindik berdi. Osy jyldyń sońyna deıin bul tásildi taǵy 2 basqa memlekettik qyzmet boıynsha iske asyrý josparlanýda.