N26 qalalyq emhanasynyń jalpy tájirıbelik dárigeri Anel Dosboda jylý júrek-qantamyr júıesi úshin óte qaýipti ekenin, tipti jas jigit ystyq kúnde jylý soqqysynan ólýi múmkin ekenin atap ótti, dep habarlaıdy Almaty-akshamy.kz.
«Artyq salmaq pen kóbine otyryp jumys isteıtin adamdar, 75 jastan asqandar, náresteler men júkti áıelder eń osal bolyp tabylady. Sportshylar, aýyr fızıkalyq eńbekpen aınalysatyndarǵa da tez kún ótip ketýi múmkin. Sonymen qatar júrek aýrýy, joǵary qan qysymy, qant dıabeti, búırek aýrýy, psıhıatrıalyq buzylýlar sıaqty aýrýlary bar adamdardyń da saq bolǵany abzal», - dep qosty dáriger.
Jazdyń ystyq kúnderinde dáriger ózin últrakúlgin sáýlelerdiń áserinen qorǵaýǵa keńes beredi. Ystyqta fızıkalyq belsendilikti azaıtý, salqyn bólmede uzaq turý, kóp sý ishý, tabıǵı matadan jasalǵan keń kıim kıý jáne basyńyzǵa bas kıim kıý qajet. Kún astynda kóp serýendeýden aýlaq bolyńyz. Ásirese tańǵy saǵat 11:00 men 15:00 aralyǵynda kún astyna shyǵý óte qaýipti bolyp esepteledi.
Eger kún ótip ketse, birinshi kezekte denede otteginiń qalypty jaǵdaıda bolýyn jáne jylý almasýdy qalpyna keltirý qajet.
«Artyq, kedergi keltiretin kıimdi sheshińiz. Múmkin bolsa, deneńizdi sýmen salqyndatyńyz. Odan da jaqsysy, dymqyl súlgimen nemese maılyqpen basyńyzǵa kompres jasańyz. Býlanǵan sý temperatýrany tómendetýge kómektesedi. Eger sergitetin salqyn dýsh qabyldaý múmkindigi bolsa -- ony dereý jasańyz! Negizgi mindet-deneni salqyndatý», - deıdi maman.
Eger adamnyń jaǵdaıy jaqsarmasa jedel járdem shaqyrýǵa nemese ony aýrýhanaǵa jetkizýge maman keńes beredi.