Qazaqstan Prezıdenti Astanaǵa resmı saparmen kelgen Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovti qabyldady.
Memleket basshysy túrikmen dıplomatyna iltıpat bildire otyryp, dostyq, tatý kórshilik jáne strategıalyq seriktestik rýhynda nyǵaıyp kele jatqan qazaq-túrikmen qatynastarynyń qazirgi jaı-kúıine oń baǵa berdi, dep habarlaıdy Almaty-akshamy.kz Aqordanyń resmı saıtyna silteme jasap.
"Biz Túrikmenstandy senimdi strategıalyq seriktes jáne tarıhı turǵydan týys memleket retinde qarastyramyz. Shyn máninde, sońǵy jyldary elderimiz arasyndaǵy yntymaqtastyq qaryshtap damyp, sonyń ishinde ekonomıkanyń strategıalyq salalary tyń qarqyn aldy", – dedi Prezıdent.
Qasym-Jomart Toqaev oraıly sátti paıdalana otyryp, Túrikmenstan Prezıdenti Serdar Berdimuhamedov pen Túrikmen halqynyń ulttyq kóshbasshysy, Halk Maslahatynyń tóraǵasy Gýrbangýly Berdimuhamedovke izgi tilegin joldady.
Rashıd Meredov dástúrli túrde qurmet kórsetkeni úshin Qazaqstan Prezıdentine alǵys aıtyp, memleketaralyq baılanystardyń barlyq baǵyty boıynsha Astanamen aradaǵy ekijaqty yntymaqtastyqty odan ári keńeıtýge Ashhabadtyń beıildi ekenin rastady.
Kezdesýde saýda-ekonomıka, energetıka jáne kólik-logıstıka salalaryndaǵy iri jobalardyń júzege asyrylý barysy talqylandy. Sondaı-aq atalǵan jobalardy tolyqtaı iske asyrý mańyzdy ekeni atap ótilip, bul baýyrlas memleketter arasyndaǵy qarym-qatynastarǵa jańa sıpat beretini jaıynda aıtyldy.
Budan bólek, jyldan-jylǵa tyń mazmunmen baıyp kele jatqan mádenı-gýmanıtarlyq saladaǵy yqpaldastyqqa basa mán berildi.
Qasym-Jomart Toqaev pen Rashıd Meredov óńirlik jáne halyqaralyq kún tártibindegi ózekti máselelerdi talqylap, joǵary deńgeıdegi baılanystardyń aldaǵy kestesin qarastyrdy.