Fransıada eki eko-belsendi kúni keshe Parıjdegi Lývrda qoıylǵan Leonardo da Vınchıdiń «Mona Lıza» kartınasyna sorpa bankalaryn laqtyrdy.
Keskindeme shedevri oq ótkizbeıtin áınekpen qorǵalǵan, sondyqtan ol zardap shekken joq, dep habarlaıdy Almaty-akshamy.kz.
Le monde basylymynyń málimetinshe, qorǵanys áınegine sorpa shashqannan keıin, áıelder qorshaýdyń astyna kirip, sýrettiń janyna baryp, olardyń biri kýrtkasyn sheship, aınalasyndaǵylarǵa «Riposte Alimentaire» dep jazylǵan aq fýtbolkasyn kórsetti.
Riposte Alimentaire (Food Response) — Dernier Renovation ekogrýppasynyń tarmaǵy, olar ózderiniń bul áreketin klımattyq jáne áleýmettik deńgeıde «qoǵamdy túbegeıli ózgertý maqsatynda fransýzdyq azamattyq qarsylyq naýqany» retinde kórsetedi. Riposte Alimentaire - Ulybrıtanıadaǵy Just Stop Oil qosa alǵanda, álemniń 12 elindegi A22 «narazylyq toptary jelisiniń» bóligi. «Biz áleýmettik kúıreýdiń aldyn alatyn sońǵy urpaqpyz», — delingen qozǵalys saıtynda.
«Qaısysy mańyzyraq, óner me, álde durys jáne turaqty tamaqtaný quqyǵy ma? Bizdiń aýylsharýashylyq júıemiz nasharlaǵan. Bizdiń fermerler jumystarynan aıyrylýda. Árbir úshinshi fransýz kún saıyn tamaqtanbaıdy», — dep daýystady belsendiler murajaı qaýipsizdik qyzmetkerleri olardy qorshap alǵanǵa deıin.
Esterińizge sala keteıik, negizi osy «Mona Lızaǵa» 1956 jyly da shabýyl jasalǵan. Kórme kezinde qonaqtardyń biri sýretke kúkirt qyshqylyn shashyp jiberip, onyń tómengi bóligin búldirgen.