«Ábilhan Qasteevtiń 120 jyldyǵy» halyqaralyq baıqaýy aıasynda, halyq sýretshisiniń atyn ıelengen Memlekettik mýzeıde balalar shyǵarmashylyǵy kórmesi uıymdastyryldy. Onda músin, anımasıa jáne sándik-qoldanbaly óner týyndylary qoıyldy. Qatysýshylar balań kartınalaryn halyq sýretshisiniń ónerin zerdelep, shyǵarmalarynan shabyt alyp, ár túrli tehnıka qoldaný arqyly beınelegen.
Baıqaý bastamashysy – Ábilhan Qasteev atyndaǵy beıneleý óneri jáne dızaın mektebiniń ujymy. Atalǵan mektep sonaý 1981 jyly qurylǵan. Qazirgi ýaqytta mektepte «Beıneleý óneri» jáne «Tehnıka jáne dızaın» degen eki bólim jumys isteıdi. 30 jyldan astam ýaqyt ishinde óner mektebi 100-den astam konkýrstyq jobalarǵa belsendi qatysqan. Bul izdi qazir de jalǵap keledi.
Mektep jyl saıynǵy Respýblıkalyq plener-master-klass ótkizýdiń bastamashysy bolyp otyrady. Onda Qazaqstan Respýblıkasy men sheteldiń tanymal beıneleý jáne qoldanbaly óner sheberleri balalar úshin sheberlik hám shyǵarmashylyq sabaqtary ótkizilip turady.
Halyqaralyq kórmege 500-den astam jumys usynyldy, onda elimizdiń barlyq aımaǵy men kórshiles elderden tilek bildirgen órender qatysty. Óner de jas urpaqty jaqsylyqqa, adamgershilik qasıetterge baýlıtynyn eskersek, bizdi ónerdi qadirleıtin, jany názik, sýret salýǵa qumar balalardyń kóptigi qýantty.