Pılottyq joba júrip jatyr.
Bıyldan bastap salyqshylarǵa bank málimetterine sáıkes kásipkerlik qyzmetpen aınalysý belgileri bar tulǵalar týraly aqparattar túsedi, dep habarlaıdy Almaty-akshamy.kz
Vıse-premer – qarjy mınıstri Erulan Jamaýbaev mobıldi aýdarymdar úshin kimderge salyq salynatynyn túsindirdi.
Mınıstr mobıldi aýdarymdardy retteıtin zań byltyr qabyldanǵanyn eske saldy. Aıtýynsha, banktermen pılottyq joba júrip jatyr.
"Biz mynadaı krıterıı qoıdyq – úsh aı ishinde bir kartochkaǵa 100 aýdarym. Biz baqylaımyz. Bul shartty krıterııler, biz ony ózgertýimiz de múmkin, az ne kóp bolýy da yqtımal. Zań byltyr qabyldanǵan jáne kásipkerlik qyzmet belgileri bar mobıldi aýdarymdarǵa salyq salýǵa baǵyttalǵan. Al eger mobıldi aýdarymdar týysqandar, áriptester arasynda jasalsa, endi túrli jaǵdaı bolady ǵoı, onda bul kásipkerlik qyzmetke jatpaıdy jáne oǵan salyq salynbaıdy", - dep túsindirdi Jamaýbaev májilis kýlýarynda.
Aıtýynsha, bıznesi bar adamdar kásipkerlik qyzmet túri boıynsha tirkelip, aýdarymdar úshin bólek arnaıy shot ashýy kerek. Sóıtip salyq tóleýge mindetteledi.
Qarjy mınıstrligi Memlekettik kirister komıteti túsindirgendeı, bıyldan bastap salyqshylarǵa bank málimetterine sáıkes kásipkerlik qyzmetpen aınalysý belgileri bar tulǵalar týraly aqparattar túsedi.
Eger azamattyń jeke bank shotyna úsh aıdyń ishinde aı saıyn 100 ne odan kóp adamnan aqsha tússe, olar baqylaýǵa alynady.
Bankter kezeń-kezeńmen aqparat usynady:
2023 jyldan bastap – memlekettik qyzmetshiler, olarǵa teńestirilgen tulǵalar jáne olardyń jubaılary boıynsha;
2024 jyldan – memlekettik mekemeler, kvazımemlekettik sektor sýbektileriniń qyzmetkerleri men olardyń jubaılary;
2025 jyldan – jeke kásipkerler, zańdy tulǵalardyń basshylary men olardyń jubaılary;
2026 jyldan – halyqtyń qalǵan bóligi boıynsha.