Elimizdiń keıbir aımaǵynda mıtıń ótkizý sharttaryna ózgerister engizilýi múmkin. «Ashyq NQA» portalynda kóptegen qala, aýdan ákimdikteri beıbit jınalystardy uıymdastyrýǵa jáne ótkizýge arnalǵan oryndarǵa qatysty qoldanystaǵy normatıvtik quqyqtyq aktilerdi ózgertetin jergilikti máslıhattardyń jańa sheshimderiniń jobasyn jarıalady.
Eger ózgerister qabyldansa, keı aýdanda buqaralyq narazylyq sharalaryn ótkizýge tyıym salynǵan aýmaqtardyń sheńberi birden 8 ese artyp shyǵa kelmek. Mamandar munyń zań aıasyndaǵy rásimder ekenin aıtady.
Bul qujattar sonymen birge:
- Beıbit jınalystardy uıymdastyrý jáne ótkizý úshin arnaıy oryndardy paıdalaný tártibin;
- Mıtıń ótetin arnaýly oryndardyń shekti tolý normalaryn;
- Beıbit jınalystardy uıymdastyrý jáne ótkizý úshin arnaıy oryndardy materıaldyq-tehnıkalyq jáne uıymdastyrýshylyq qamtamasyz etýge qoıylatyn talaptardy qaıta qaraıdy.
Qujattar pıket ótkizýge tyıym salynǵan irgeles aýmaqtardyń shekaralaryn qaıta aıqyndaıdy. Buǵan qosa irgesinde mıtıń, pıket ótkizýge tyıym salynǵan nysandar qatarynan «Tuńǵysh prezıdenttiń rezıdensıalary» alynyp tastaldy. Tek QR prezıdentiniń rezıdensıalaryna irgeles jatqan aýmaqtarda narazylyq aksıasyn uıymdastyrýǵa salynǵan tyıym saqtaldy.
Elordanyń ákimdigi de «Astana qalasynda beıbit jınalystardy uıymdastyrý jáne ótkizý úshin arnaıy oryndardy anyqtaý týraly» máslıhattyń jańa sheshiminiń jobasyn jarıa etti.
Onda ózge ózgerister syrtynda, beıbit jınalystar, sonyń ishinde mıtıńter, sherýler men pıketter uıymdastyrýǵa bolatyn oryndar sany arttyryldy.
Buǵan deıin 2020 jylǵy 30 maýsymnan beri qoldanylyp kelgen «Nur-Sultan qalasynda beıbit jınalystardy uıymdastyrý jáne ótkizý úshin arnaıy oryndardy anyqtaý týraly» máslıhat sheshimine sáıkes, bas qalada beıbit jınalystar, mıtıńter, sherýler, pıketter ótkizýge 3 oryn ǵana bólingen bolatyn.
Olar:
- A. Pýshkın kóshesi men Sh. Qudaıberdiuly dańǵyly qıylysyndaǵy saıabaq;
- «Stolıchnyı» sırki janyndaǵy alań;
- Jeńis, Abaı dańǵyly, T. Begeldınov jáne Jeltoqsan kósheleri tórtburyshyndaǵy alań.
Máslıhattyń jańa sheshiminiń jobasynda Astanada beıbit jınalystar, mıtıńter, sherýler, pıketter ótkizýge arnalǵan oryndar sany 5-ke deıin kóbeımek.
Tótenshe, soǵys jaǵdaıy nemese terorızmge qarsy operasıanyń quqyqtyq rejımi engizilgen kezde beıbit jınalystar ótkizýge tyıym salynýy nemese shekteý qoıylýy múmkin.
Beıbit jınalystar tek jergilikti máslıhat sony ótkizý úshin aıqyndaǵan orynda nemese júrý marshrýty boıynda iske asyrylsa ǵana beıbit jınalys dep tanylady. Basqa jaǵdaılarda májbúrlep taratylýy múmkin.
Beıbit jınalys sıpatyna qaraı beıbit bolýǵa, kúsh qoldanylmaýǵa, qatysýshylary qarýlanbaýǵa tıis. Olar «memlekettik qaýipsizdik, qoǵamdyq tártip, densaýlyq saqtaý, halyqtyń ımandylyǵy, basqa adamdardyń quqyǵy men bostandyǵyn qorǵaý múddelerine qater tóndirmeýge» mindetti.
Sherý kezinde qoǵamdyq mańyzy bar máselelerdi kóterýge, tulǵalardyń, organdardyń, uıymdardyń áreketterine ne áreketsizdigine narazy pikir jarıalaýǵa, dybys kúsheıtkish tehnıkalyq quraldarmen ne onsyz urandaýǵa, plakattar, transparanttar jáne ózge de kórneki úgitteý quraldaryn kóterýge ruqsat.