Telehıkaıa «Mirjaqyp. Oıan, qazaq!» dep atalady.
Mirjaqyp Dýlatuly týraly telehıkaıanyń túsirilimi bastaldy, dep habarlaıdy Almaty-akshamy.kz.
Tarıhı týyndyda Alash qaıratkeriniń ult múddesi jolyndaǵy eren eńbegi men qıly taǵdyry sýretteledi. Alty bólimnen turatyn serıaldy byltyr «Ahmet. Ult ustazy» hıkaıasyn túsirgen shyǵarmashylyq top qolǵa aldy.
Telehıkaıada Mirjaqyptyń qoǵamdyq-saıası qyzmeti, sol dáýirde basty uranǵa aınalǵan «Oıan, qazaqtyń» shyqqan ýaqyty kórsetiledi. Sonymen qatar, Alashorda kezeńi men Keńes úkimeti ornaǵannan keıingi ult zıalylarynyń qýdalaýy sýretteledi. Basty róldegi akter - Baqyt Qajybaev.
«Mirjaqyptaı tulǵany somdaý úshin úlken daıyndyq qajet etedi. Barynsha daıyndalýǵa tyrystym. Áli de kúmán óte kóp. Zertteıtin tustary óte kóp. Bul endi semka barysynda rejısermen aqyldasyp otyryp, áńgimelese kele, taǵy da kóbirek daıyndyq bolady degen úmit bar», - deıdi basty keıipker rólindegi akter Baqyt Qajybaev.
Bul serıal «Ult ustazy. Ahmet» telehıkaıasynyń paralleli ispetti. Bul týyndyda da Álıhan Bókeıhannyń rólin Baýyrjan Qaptaǵaı, Ahmet Baıtursynulyn Baıǵalı Esenálıev oınaıdy. Fılmge daıyndyq sáýirden bastaldy. Derekter zertteldi, estelikter oqyldy, mamandar tarıhqa úńildi. Bul rette, sırek qoljazbalar qorynan 1910 jyly shyqqan «Oıan, qazaq» kitaby alynǵan. Onyń kóshirmesi jasalyp, telehıkaıa arqyly kórermenge usynylmaq.
«Mirjaqyp Dýlatulynyń basqa Alash qaıratkerlerinen ereksheligi dese de bolady, ol kisiniń óziniń týǵan qyzy Gúlnar Dýlatova bertinge deıin bizdiń aramyzda ómir súrdi. Óte mol mura qaldyryp ketti artyna. Tek ákesi týraly emes, barlyq alashordashylar jaıly. Bizge biraz qazyna boldy», - deıdi «Mirjaqyp. Oıan, qazaq!» telehıkaıasynyń rejıseri Murat Esjan.
Tarıhı týyndynyń túsirilimine bas-aıaǵy 80 akter qatysyp jatyr. Sondaı-aq, 200-deı adamnyń qatysýymen kópshilik sahnalary túsiriledi. Rejıserlik top túsirilimdi qazan aıynda aıaqtaıdy. Al «Mirjaqyp. Oıan, qazaq!» telehıkaıasyn kórermen nazaryna usyný jeltoqsanǵa josparlanǵan.