QR Bas prokýratýrasy men İİM qańtar oqıǵasy jaıynda resmı málimdeme jasaýda.
Ortalyq komýnıkasıalar qyzmetinde QR İİM Tergeý departamentiniń bastyǵy Sanjar Ádilov elimizdegi tártipsizdik kezinde qozǵalǵan qylmystyq ister týraly aıtty, dep habarlaıdy Almaty-akshamy.kz
«Tártipsizdik barysynda 7 ańshylyq dúkenine shabýyl jasalyp, tonaldy. Olardan 1 564 azamattyq qarý urlandy», - dedi S. Ádilov.
Memleket basshysy lańkestik aktiler sebepterin jáne uıymdastyrýshylaryn anyqtaý boıynsha tergeýdi Bas prokýratýraǵa tapsyrdy.
Osyǵan baılanysty, atalǵan sanattaǵy jáne onymen baılanysty barlyq qylmystyq ister arnaıy prokýrorlar basshylyq etetin vedomstvoaralyq jedel-tergeý toptarynyń is júrgizýine berildi. Qalǵan qylmystyq ister boıynsha tergeýdi ishki ister, ulttyq qaýipsizdik, ekonomıkalyq tergeý jáne sybaılas jemqorlyqqa qarsy qyzmet organdary júrgizýde.
«Osy qylmystardyń negizgi úlesin, ıaǵnı 70 paıyzyn nemese 1 356-sy negizinen tártipsizdikterden týyndaǵan haos prosesinde Almaty qalasynyń saýda obektilerinen jasalǵan urlyq týraly ister quraıdy. 127 qylmystyq is atys qarýy men oq-dárilerdi zańsyz saqtaý faktileri boıynsha, taǵy 30 is olardy urlaý faktileri boıynsha tergelýde. Sonymen qatar, 63 qylmystyq is múlikti qasaqana búldirý jáne joıý, 12-si avtokólikti aıdap ketý, 24-i – qaraqshylyq jáne tonaý, 23-i quqyq qorǵaý organdary qyzmetkerlerine kúsh qoldaný ári olardyń ómirine qol suǵý faktileri boıynsha tirkeldi», - dedi Tergeý departamentiniń bastyǵy.
Budan buryn habarlanǵandaı, tártipsizdik kezinde zaqym kelgen nysandar men kólikter sany belgili boldy. Sonymen qatar, qarý urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy.