Búgin QR Bas prokýratýrasy qańtar oqıǵasy týraly túsinik berdi.
QR Bas prokýratýrasy 1-qyzmet bastyǵynyń orynbasary Eldos Qılymjanovtyń málimdeýinshe, qazirgi ýaqytta prokýrorlardyń ótinishteri boıynsha qamaýǵa alýdan 1 149 adam bosatyldy, 577 is boıynsha aıyppuldar eskertýlerge aýystyryldy, 393 ákimshilik is qylmystyq quramy bolmaýyna baılanysty tolyǵymen toqtatyldy, dep habarlaıdy Almaty-akshamy.kz Almaty arnasyna silteme jasap.
«Osylaısha, sotpen ákimshilik qamaýǵa alynǵan 3 314 tulǵanyń ishinen tek 63-i qamaýda qalyp otyrǵanyna nazarlaryńyzdy aýdarǵym keledi. Bul rette prokýrorlardyń ákimshilik jazany jeńildetýge arnalǵan taǵy 13 ótinishhaty sottarda qaralýda. Jalpy, osy jyldyń 25 qańtaryndaǵy jaǵdaı boıynsha, jedel tergeý toptarynyń óndirisinde 2 044 qylmystyq is bar. Osy ister boıynsha 898 kúdikti ustalǵan. Olardyń ishinen 802-si sot sanksıasymen qamaýǵa alyndy, 50-ne úı qamaǵy, al 21 tulǵaǵa kepil, 12-ne eshqaıda ketpeý qolhaty taǵaıyndaldy, 13-i boıynsha bultartpaý sharasy týraly másele qaralýda», - dedi spıker.
Qılymjanovtyń baıandaýynsha, prokýratýra organdary qaıǵyly oqıǵalardy tergeý kezinde zańnyń saqtalýyn qamtamasyz etedi.
Prokýratýra organdaryna tyıym salynǵan tergeý ádisteri jáne quqyq qorǵaý organdary qyzmetkerleriniń tergeý barysynda azamattardyń quqyqtaryn buzý derekteri boıynsha 109 shaǵym tústi. Bılikti jáne laýazymdyq ókilettilikti asyra paıdalaný týraly 11 shaǵym boıynsha prokýrorlar sotqa deıingi tergep-tekserýdi bastady. Al qylmystyq qýdalaý organdary prokýratýranyń nusqaýymen 10 qylmystyq isti tirkedi, - dep túsindirdi Bas prokýratýra ókili OKQ-da.
Onyń sózinshe, búgingi kúni 21 qylmystyq is óndiriste. Olardyń 20-syn sybaılas jemqorlyqqa qarsy qyzmetkerler men arnaıy prokýror tergep jatyr. Sondaı-aq 43 aryz boıynsha tekserýler jalǵasyp jatyr. 22-si óz dálelderin tappady.