McDonald's-tyń Reseıden ketýine baılanysty shıkizatty jetkizýde másele týyndaǵan.
Aýyl sharýashylyǵy mınıstrligi ókilderi McDonald's meıramhanalary jabylýyna qatysty pikir bildirdi, dep habarlaıdy Almaty-akshamy.kz Aýyl sharýashylyǵy mınıstrliginiń baspasóz qyzmetine silteme jasap.
Vedomstvo málimetinshe, McDonald's meıramhanalar jelisi reseılik et ónimderi jáne jartylaı fabrıkattarmen qamtamasyz etilgen. Biraq McDonald's-tyń Reseıden ketýine baılanysty shıkizatty jetkizýde másele týyndaǵan.
«Sheteldik kompanıa ókilderi keleshekte qazaqstandyq ónimge kóshýge daıyn bolǵan. Alaıda otandyq óndirýshilerdiń kompanıanyń joǵary standarttaryn engizýi biraz ýaqyt aldy. McDonald's ókilderiniń ótinishi boıynsha, jergilikti shıkizatqa kóshkenge deıin Qazaqstan úkimeti el aýmaǵyndaǵy meıramhanalar jelisiniń jabylýyna jol bermeý úshin úshinshi elderden ónim jetkizý rásimderin jedeldetýge daıyn boldy. Múddeli memlekettik organdar osy másele boıynsha birqatar keńester ótkizdi», - delingen mınıstrlik habarlamasynda.
Mınıstrlik málimetinshe, qazaqstandyq et pen sút ónimderin kompanıa talaptaryna sáıkestendirý boıynsha jumys bastalǵan.
«Qazirgi ýaqytta qazaqstandyq et jáne sút ónimderin óndirýshiler óndiristi McDonald's talaptaryna sáıkestendirý jumystaryn bastady. 2023 jyldyń basynda kásiporyndardyń aýdıti boıynsha jumystar josparlanǵan bolatyn. Alaıda McDonald's-tyń jabylýyna baılanysty josparlanǵan aýdıt bolǵan joq», - delingen habarlamada.
Bul kompanıaǵa shıkizat nemese jartylaı fabrıkattar jetkizýshisi bolý úshin arnaıy sertıfıkattaýdan ótý kerek, bul búkil óndiris tizbegine qatań talaptar qoıylatynyn bildiredi. Oǵan mal azyǵynan bastap qaptamaǵa deıingi aralyq kiredi. Alaıda mınıstrlik málimetinshe, bul jaǵdaıda kompanıanyń belgili bir jetkizýshini tańdaıtynyna kepildik joq.
Eske salaıyq, buǵan deıin Qazaqstanda McDonald’s meıramhanalary jumysyn toqtatqany týraly aıtyldy.