Baspana alatyn azamat 20 paıyz alǵashqy jarna tóleýi tıis
Elimizde taıaýda iske qosylýy múmkin jańa ıpotekalyq baǵdarlamanyń sharttary usynyldy. Onyń erejeleri ashyq talqyǵa shyǵarylǵan Indýstrıa jáne ınfroqurylymdyq damý mınıstrliginiń buıryǵynda kórsetilgen, dep habarlaıdy Almaty-akshamy.kz QazAqparatqa silteme jasap.
Usynylyp otyrǵan ıpotekalyq baǵdarlamanyń jyldyq mólsherlemesi 11,5 paıyz kóleminde bekitilmek. Atalǵan baǵdarlama arqyly baspana alatyn azamat 20 paıyz alǵashqy jarna tóleýi tıis.
«Astana jáne Almaty qalalarynda turǵyn úı satyp alý kezinde sýbsıdıalaýǵa jatatyn ıpotekalyq turǵyn úı qaryzynyń eń joǵary somasy - 35 mln teńgege deıin bekitiledi. Al Aqtaý, Atyraý jáne Shymkent qalalarynda - 25 mln, Qaraǵandy qalasynda - 20 mln jáne basqa óńirlerde -15 mln teńgege deıin qarajat usynylady», - delingen buıryqta.
Qarjy ortalyq memlekettik organdarda tirkelgen, lısenzıasy bar ekinshi deńgeıli bankter arqyly beriledi. Ipotekanyń eń uzaq merzimi - 10 jyl.