Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın búgin baılanys operatorlarynyń qyzmetine shúılikti.
Ol ınternet operatorlaryna jyl sońyna deıin 4 mlrd teńge aıyppul salýǵa ýáde berdi, dep habarlaıdy Almaty-akshamy.kz.
«Aıyppuldar óte tómen bolǵan kezde olar odan qoryqpaıtyn. 2020 jyly biz 100 mln teńgege deıin ǵana aıyppul jazyp bergenbiz. Al bıyl jarty jyldyń ózinde 1,5 mlrd teńgeniń aıyppulyn jazdyq. Jyl aıaǵyna deıin 4 mlrd teńgedeı anyq bolady, men ýáde beremin. Bul – olardyń qaltasyna aıtarlyqtaı salmaq. Sondyqtan olar oılanyp, belgili bir naqty sharalar usyna bastady», - dedi Baǵdat Mýsın.
Onyń paıymynsha, mınıstrlik aıyppuldy kótergen soń operatorlar da tarıfti kóterdi degen túsinik – jańsaq.
«Tarıfti birjaqty tártippen kóterý máselesi turǵan joq. Másele ınvestısıanyń bar-joǵynda. Aıyppuldy kóterip edik, olar sapany kóterý kerektigin túsindi», - dedi mınıstr.