Keıbir ákimdikter qantty ózindik qunynan tómen baǵamen de satqan
Aýyl sharýashylyǵy mınıstri Erbol Qarashókeev elimizde qazir qant baǵasy qansha bolýy kerek ekenin aıtty. Onyń aıtýynsha, qant quraǵy shamamen eki ese, 476 dollarǵa deıin qymbattaǵan. Logıstıka shyǵyndary da 2,6 ese, 110 dollardan 290 dollarǵa deıin ósken, dep habarlaıdy Almaty-akshamy.kz kazbusiness.kz saıtyna silteme jasap.
«Bul jaǵdaı otandyq qant zaýyttarynda quraq qanttyń ózindik qunynyń ósýine ákep soqty. Búgingi tańda zaýyttar 1 keli qantty 450 teńgege satady. Bul rette kóterme jáne bólshek saýda satýshylary qosatyn 15% ústeme baǵany eskersek, qanttyń eń tómen baǵasy shamamen bir kelisi 595-600 teńge bolýy qajet», — dedi Qarashókeev ortalyq komýnıkasıalar qyzmetinde ótken baspasóz máslıhatynda.
Ol baǵany turaqtandyrý jónindegi sharalar aıasynda óńirlerdiń turaqtandyrý qorlary qantty tómen baǵamen satyp jatqanyn atap ótti. Al bul dúrbeleń men úlken suranysqa alyp kelip jatyr.
Aıtýynsha, keıbir ákimdikter qantty ózindik qunynan tómen baǵamen de satqan. Mysaly, Pavlodar oblysy turaqtandyrý qory qantty 448 teńgege satyp alyp, 416 teńgege, al Qyzylorda oblysy 450 teńgege satyp alyp, 370 teńgeden satqan. Almaty oblysy qantty 276 tg/kg, Aqtóbe oblysy 363 tg/kg, Mańǵystaý oblysy 400 tg/kg satqan.
«Ákimdikterdiń osy is-áreketi dúrlikpe suranys pen áleýmettik shıelenistiń týyndaýyna ákep soqtyrýda», — dedi mınıstr. Vedomstvo basshysy ishki naryqta komersıalyq qanttyń kólemi jetkilikti ekenin málimdedi.