Kásipkerlerdiń pikirinshe, qatań karantındik sharalar basqa salalarǵa da qaýip tóndiredi
«Atameken» QR UKP alańynda koronavırýs ınfeksıasynyń órshýine baılanysty qyzyl aımaqqa kóshý jaǵdaıynda karantındik shekteý sharalary talqylandy. Jıynǵa 150-den astam kásipkerlik qaýymdastyq ókilderi, sondaı-aq, densaýlyq saqtaý mınıstrligi men Ulttyq palata ókilderi qatysty, dep habarlaıdy Almaty-akshamy.kz vedomstvonyń baspasóz qyzmetine silteme jasap.
Karantın sharalary talqylaý kezinde bıznes-qaýymdastyq qatań shekteý sharalaryn engizý burynǵy shekteýlerden qalpyna kele bastaǵan bızneske úlken soqqy beredi dep sanaıdy.
«Kásipker men jeke tulǵa arasyndaǵy jaýapkershiliktiń arajigi ajyratylyp jazylǵanyn qalaımyn. Áleýmettik qashyqtyqty saqtaý, maska rejımi. Kelýshiler maska rejımin saqtamaǵan jaǵdaıda shegi joq aıyppul saldarynan bıznestiń jabylyp qalǵan jaǵdaılar qandaı bolǵanyn bárimiz bilemiz. Bızneske aıyppul salyp, kedergi keltiredi. Sondyqtan jaýapkershilikti naqty jazaıyq. Kásipker búkil halyq úshin jaýap bere almaıdy», – dedi bólshek saýda jáne tamaqtaný qaýymdastyǵynyń prezıdenti Marına Boshel.
Jıyn barysynda kásipkerler karantın sharalary nemese lokdaýn bolsa, memleketten qandaı qarjylaı kómek bolatyny da aıtyldy.
«Eger shekteý engiziletin bolsa, salyq tóleý jaǵyn sheshý kerek. Óıtkeni shekteý bastalysymen bıznestiń shyǵyny eselene túsedi. Tipti maskalardyń ózi úlken shyǵyn. Onda salyq tóleý men tekserýge moratorıı engizýdi qarastyrý kerek. Osy panedmıa bolǵan úsh jylda bıznesti áýre-sarsańǵa túsirgeni eshkimge jasyryn emes», – dedi Marına Boshel.
Al qaýymdastyq ókili Olga Egorova Ashyq-ty engizý, maska rejımin engizý jańa jumys birligin ashýdy qarastyratynyn aıtty. Iaǵnı qaıtadan kúzetke adam jaldap, qaıtadan kireberiske adam qoıý qajet bolady.
Kásipkerlerdiń pikirinshe, qatań karantındik sharalar basqa salalarǵa da qaýip tóndiredi.
«Biz áli aıaqqa turmadyq. Tehnıkany jańarta almadyq, aqsha tappadyq, qazir biz kóptegen júrgizýshi, barlyq deńgeıdegi mamandardan aıyryldyq. Iaǵnı, bul jaı ǵana bıznesti emes, tutas salany joıýǵa aparady», – dep atap ótti «Qostanaı oblysynyń jolaýshylar kóligimen tasymaldaýshylar qaýymdastyǵynyń, avtovokzaldar men avtostansıalardyń» bas dırektory Leonıd Kýshnerov.
Óz kezeginde týrısik salanyń ókili Inna Reı bızneske qatysty eshqandaı shekteý sharalary engizilmeýi tıis dep esepteıdi. Onyń pikirinshe, sanıtarıalyq jospar oryndy. Óıtkeni bıznes endigi qatań shekteýlerge tótep bere almaıdy.
Talqylaý barysynda aqparattyq qaýipsizdik sertıfıkaty joq jáne ónerkásiptik paıdalanýǵa berilmegen Ashyq engizýdiń zańdylyǵy máselesi kóterildi. Bul másele boıynsha kásipkerlerdiń alańdaýshylyǵyn QR DSM sanıtarıalyq-epıdemıologıalyq baqylaý komıteti tóraǵasynyń orynbasary Sáýle Ahmetova seıiltti.
«Ashyq platformasy arýhanalardaǵy tósek-oryn qorynyń 50%-dan astamy tolǵan kezde qoldanylady. Eger densaýlyq saqtaý júıesi úlgermeı qalsa, onda 2020 jyldaǵy jaǵdaı qaıtalanady, sonda Ashyq engiziledi. Qazirgi kezde Ashyq aqparattyq qaýipsizdikke synaqtan ótip jatyr. Baǵdarlama jaqyn arada ónerkásiptik paıdalanýǵa beriledi. Jyl boıy ol tájirıbelik paıdalanýdan ótti. Iaǵnı, tájirıbelik paıdalanýdan keıin ol ónerkásipke engiziledi», – dep túsindirdi Sáýle Ahmetova.
Densaýlyq saqtaý mınıstrliginiń ókili sonymen birge qazirgi kezde usynylǵan sharalar Densaýlyq saqtaý júıesine júktemeni eskere otyryp, jańa matrısaǵa negizdelgenin túsindirdi. Sary aımaqta sharalar usynymdyq sıpatta bolady. Al qyzyl aımaq kezinde ótken jylmen salystyrǵanda jumsaq nusqa usynylady.
Keńes qorytyndysy boıynsha bıznestiń barlyq usynysy, qarsylyǵy men qaýipteri qyzyl aımaq úshin karantındik sharalardy ázirleý kezinde esepke alý úshin densaýlyq saqtaý mınıstrligine jiberiledi.