Qazaqstandyqtar quldyqtyń qandaı túrlerine jıi ushyraıtyny aıtyldy
Bul týraly Qazaqstan Prezıdenti janyndaǵy Adam quqyqtary jónindegi komısıanyń hatshysy Tastemir Ábishev Ortalyq komýnıkasıalar qyzmetindegi dóńgelek ústelde aıtty, dep habarlaıdy Almaty-akshamy.kz Baq.kz-ke silteme jasap.
«Adam saýdasy degen bazarǵa baryp, áıeldi, qyzdy nemese er balany satyp alý emes, bul quldyqtyń zamanaýı túrleri. Eńbek pen jumys arqyly qanaý, seksýaldy qanaý, adamnyń dene músheleri men ulpalaryn alyp qoıý nemese bizdiń qyz-kelinshekterdi erkinen tys sýrogatty ana retinde paıdalanyp, balasyn alyp qoıý nemese olardy basqa adamǵa baqtyrý», - dedi ol.
Tastemir Ábishev adam saýdasy álemdegi zańsyz tabystardyń ishinde zańsyz qarý saýdalaý men esirtki saýdasynan keıingi úshinshi orynda ekenin atap ótti. Osy oraıda adam saýdasyna, ıaǵnı quldyqtyń zamanaýı túrlerine qarsy kúres jónindegi bólek zań qazirgi ýaqytta ázirlenip jatqanyn jáne 2023 jyly qabyldanady dep úmittenetinin aıtty. Bul bastamany «Sana sezim» áıelder bastamalarynyń quqyqtyq ortalyǵy» qoǵamdyq birlestiginiń dırektory Shahnoza Hasanova da qoldady.
«Jyl saıyn adam saýdasynyń jańa nysandary damyp keledi. Olarmen kúresý jáne aldyn alý jumystaryn júrgizýdi jalǵastyrý kerek. Qazir ǵalamtordy adam saýdasy maqsatynda qoldaný, onlaın pornografıa qyzmetin kórsetý, vebkam stýdıalar belsendigi artty. Úkimet tarapynan erekshe nazar aýdarýdy talap etetin adam saýdasynyń qurbandaryn qorǵaý máseleleri áli de ózekti bolyp otyr. Oǵan áıelder men balalar ǵana emes, qujatsyz azamattar, bosqyndar, azamattyǵy joq tulǵalar da jatady», - dedi ol.