Bul týraly Densaýlyq saqtaý mınıstri Ajar Ǵınıat búgin ótken Úkimet otyrysynda málimdedi, dep habarlaıdy Almaty-akshamy.kz BAQ.KZ-ke silteme jasap.
Birinshiden, halyqtyń salaýatty ómir saltyn ustanýynyń tómendigi. Temeki shegý, durys tamaqtanbaý sıaqty qaýip faktorlary obyrdyń belgili bir túrleriniń damýyna áser etedi. Halyqtyń bir bóligi turǵylyqty jeri boıynsha emhanalarda onkoskrınıngten ótýge barmaıdy, bul skrınıngter obyrdy erte dıagnostıkalaý jáne isik aldy aýrýlaryn anyqtaý úshin óte mańyzdy. Onkologıalyq aýrýlardyń damýynda ekologıanyń áseri de kóp. Osyǵan baılanysty qorshaǵan ortany qorǵaý jáne eńbek jaǵdaılarynyń qaýipsizdigi jónindegi sharalardy kúsheıtý talap etiledi, - dep atap ótti vedomstvo basshysy.
Sonymen qatar mınıstr dıagnostıka men emdeýge arnalǵan medısınalyq jabdyqqa qoljetimdiliktiń bolmaýyna jáne kadr máselesine baılanysty barlyq óńirlerde onkologıalyq kómek birdeı jáne júıeli emes dep otyr.
Qoldanystaǵy sáýlelik terapıa apparattarynyń parki 50 paıyzy eskirgen. Mysaly, Atyraý oblysynda 1968 jyly shyqqan apparat qoldanylady. Batys Qazaqstan, Qostanaı, Soltústik Qazaqstan, Aqmola, Ulytaý, Jetisý, Qyzylorda oblystarynda osyndaı apparattar joq. Óńirlerdi dıagnostıkalyq jáne zerthanalyq jabdyqtarmen qamtamasyz etý tómen. Aqmola, Qostanaı, Qyzylorda oblystarynyń jáne Astana qalasynyń onkologıa ortalyqtarynda KT jáne MRT apparattary joq, - dedi Ajar Ǵınıat.
Belgili bolǵandaı, laparoskopıalyq, ıntervensıalyq jabdyqtardyń bolmaýyna baılanysty hırýrgıalyq emdeý múmkindikteri shekteýli.
Onkologıa ortalyqtary ǵımarattarynyń jartysy radıologıalyq jáne operasıalyq-reanımasıalyq jabdyqtardy ornatý úshin zamanaýı talaptarǵa sáıkes kelmeıdi. Onkologıalyq kómek kórsetýdiń barlyq deńgeılerinde kadrlar tapshylyǵy oryn alǵan. Dıagnostıka men emdeýdiń jańa tehnologıalaryn engizý boıynsha mamandardy, onyń ishinde fızıkter, hımıkter men medısına salasyndaǵy ınjenerler jetispeıdi. Taǵy bir aıta keterligi, jeke ǵylymı baza jetkiliksiz, zamanaýı tehnologıalar salasynda jeke ǵylymı ázirlemeler az. Medısınalyq kómek kórsetý servısiniń deńgeıi tómen. Medısına qyzmetkerleriniń pasıentter men olardyń týystaryna janashyrlyq, aıaýshylyq (empatıa) sezimi jetispeıdi, - dedi mınıstr.