Almatyda “Qorǵaý-Qaýipti júrgizýshi” júıesi 17 myńnan astam jol qozǵalysy erejelerin qasaqana buzýshyny anyqtady.
Mundaı málimetterdi Almaty qalasynyń ákimshilik polısıasy, “Qorǵaý-Qaýipti júrgizýshi” júıesin engizýdiń aralyq taldaýyn qorytyndylaý barysynda keltirip otyr, dep habarlaıdy Almaty-akshamy.kz Polisia.kz-ke silteme jasap.
«Bul jańashyldyq ótken jyldyń sáýir aıynda qoldanysqa engizildi. Patrúldik polısıa qyzmetkerleriniń planshetterine ornatylǵan “Qorǵaý-Qaýipti júrgizýshi” baǵdarlamasy ÁPBT jáne birqatar memlekettik organdardyń derekter bazasymen biriktirilgen. Jalǵan memlekettik nómirlerdi paıdalaný derekterin, kólik quralyn basqarý quqyǵynan aıyrylǵan júrgizýshilerdi, saqtandyrý polısi joqtardy, tólenbegen aıyppuldar boıynsha bereshegi bar adamdardy anyqtaýǵa erekshe nazar aýdarylady», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
“Qorǵaý-Qaýipti júrgizýshi” júıesiniń kómegimen 2022 jyly 14 myń 360 júrgizýshi, bıylǵy jyldyń basynan beri 3 myńnan astam júrgizýshi ákimshilik jaýapkershilikke tartyldy.
«Sonymen qatar bıylǵy jyly Almatynyń patrúldik kólikterine jol qaýipsizdigin qamtamasyz etýge jáne jol-kólik oqıǵalaryn azaıtýǵa baǵyttalǵan jańa “Sergek-Patrýl” keshenderi ornatylǵanyn aıta ketken jón. Joǵary ıntellektili kameralardyń kómegimen keshen aǵyndaǵy kólikti anyqtap, memlekettik nómirdi tanıdy jáne derekterdi serverge jiberedi. Sondaı-aq MTNB “jalǵan” emestigine, tehnıkalyq baıqaýdyń, saqtandyrý polısiniń joqtyǵyna, tólenbegen aıyppuldardyń bar-joǵyna, urlyq jáne qandaı da bir quqyq buzýshylyqqa qatysy bar-joǵyna tekseriledi», – dedi Asqat Qulbaev.