Sý salasynyń ashyq bolýyn qamtamasyz etý úshin Sý resýrstary jáne ırrıgasıa mınıstrligi Qazaqstandaǵy sý resýrstaryn paıdalaný týraly Ulttyq aqparattyq esepti jyl saıyn óziniń resmı saıtynda jarıalap otyrady.
Bul talap bıyl sáýirde Memleket basshysy qol qoıǵan jańa Sý kodeksinde kózdelgen.
Ulttyq esep – bul eldegi sý qorynyń jaı-kúıi, ony qorǵaý jáne paıdalaný boıynsha ótken kúntizbelik jylǵa arnalǵan taldaý esebi.
Onda negizgi ózenderdiń sý mólsheri, sý resýrstarynyń sý sharýashylyq baseınderi, óńirler jáne ekonomıka salalary boıynsha paıdalanylýy jóninde taldaý, sý sharýashylyǵy men gıdrotehnıkalyq qurylystardyń, onyń ishinde memleketaralyq qurylystardyń sany men jaǵdaıy týraly málimetter kórsetiledi. Sondaı-aq qujatta sý qoryn qorǵaý boıynsha atqarylyp jatqan sharalar, ınvestısıalyq jobalardy iske asyrý jáne zamanaýı tehnologıalardy engizý týraly aqparattar baıandalǵan.
«Ortalyq memlekettik jáne jergilikti atqarýshy organdar esep berý úshin aqparatty esepti jyldan keıingi jyldyń 1 naýryzynan keshiktirmeı usynýǵa mindetti. Ulttyq eseptiń ózi 1 mamyrdan keshiktirilmeı jarıalanady. Bul Qazaqstandaǵy sý resýrstaryn basqarý men paıdalanýdyń ashyqtyǵyn qamtamasyz etýge tıis. Sý kodeksiniń ózi bıyl 10 maýsymda kúshine enedi. Sondyqtan biz bul esepti 2026 jyldan bastap jarıalaı bastaımyz», – dedi Sý saıasaty departamentiniń dırektory Serikjan Beketaev.