Almatyda Oralhan Bókeıdiń 80 jyldyǵyna arnalǵan respýblıkalyq aıtys ótti
Almatyda Oralhan Bókeıdiń 80 jyldyǵyna arnalǵan alaman aıtys ótti. Ádilqazylar alqasynyń sheshimimen respýblıkalyq aıtystyń bas júlde ıegeri atanǵan Muhtar Nıazov 2.5 mıllıon teńgelik sertıfıkatpen marapattaldy. Qaziret Berdihan İ oryndy jeńip alsa, İİ orynnyń tórine Shuǵaıyp Sezimhan men Jansaıa Mýsına jaıǵasty. Al İİİ oryndy Serik Qýanǵan men Tólegen Jamanov ózara bólisti, dep habarlaıdy almaty-akshamy.kz.
«Alataý» dástúrli óner teatrynda ótken sóz saıysyna elimizdiń betke ustar 14 aıtysker aqyny qatysty. Olardyń qatarynda Ásem Erejeqyzy, Jansaıa Mýsına, Serik Qýanǵan, Aspanbek Shuǵataev, Shuǵaıyp Sezimhan, Qaziret Berdihan, Muhtar Nıazov, Ardabek Aqbaba, Nurzat Qarýqyzy, Meıirbek Sultanhan, Aqnıet Jubanysh, Tólegen Jamanov, Erjan Ámirov pen Farhat Marat bar. Kil júırik baq synasqan sóz dodasynyń tizginin áıgili aıtysker aqyn Amanjol Áltaı ustady.
«Almatynyń halqy da aıtysty saǵynyp qalǵan eken. Ine shanshar jer joq, zal tolyp otyrdy. Jyr arqaýy – qazaq ádebıetiniń zańǵar tulǵalarynyń biri, klasık jazýshy Oralhan Bókeı aǵamyz. Aıtysqa aǵamyzdyń da tikeleı qatysy bar. Ol 90-jyldardyń kezinde ózi uıytqy bolyp, Almatyda birneshe márte aıtys ótkizgen. Al búgin onyń mereıtoıynda aqyndar kelip, Oralhan aǵany jyrǵa qosyp otyr. Kitap oqıtyn, ádebıet súıetin ult bar kezde aǵamyzdyń beınesi jadymyzdan óshpek emes», – dedi Amanjol Áltaı.
Aıtys arasynda kompozıtor, etnomýzykant, QR Mádenıet qaıratkeri Edil Qusaıynov óner kórsetip, Temirbek Júrgenov atyndaǵy Qazaq ulttyq óner akademıasy Oralhan Bókeıdiń «Qar qyzy» povesi jelisinde teatrlandyrylǵan kórinisin sahnalady. Sondaı-aq sóz dodasyn tamashalaýǵa kelgen qurmetti qonaqtar men ıgi jaqsylarǵa mereıtoılyq medaldar tapsyryldy.
«Búgin qazaqtyń qabyrǵaly qalamgeriniń mereıtoıy dúrkirep toılanyp jatyr. Oralhan Bókeı shyǵarmalarynyń ómirsheńdigi sondaı, ony bir oqyǵan adam qaıta aınalyp soǵyp otyrady. Osyndaı daryndy da, talantty perzentti ómirge ákelgen shyǵystyń topyraǵy men Shyńǵystaıdyń el-jurtyna alty Alashtyń alǵysy sheksiz», – dedi bas júldeni ıemdengen aıtysker aqyn Muhtar Nıazov.
Sonymen qatar, Boshaı Kitapbaıulynyń 10 jyldyǵyna arnalǵan arnaıy júldeni Ásem Erejeqyzy enshilese, Abaı atyndaǵy halyqaralyq qor tarapynan berilgen júlde Meıirbek Sultanhanǵa buıyrdy.
Aıta ketsek, jazýshynyń týǵanyna 80 jyldyǵyn toılaý qalamgerdiń týǵan jeri Qatonqaraǵaı aýdanynda bastaý alǵan bolatyn. Mereıtoı aıasyndaǵy basty is-shara – jazýshynyń týǵan jeri Shyńǵystaı aýylynda murajaı-úıiniń ashylýy boldy. Qatonqaraǵaılyq kásipker Serik Tolyqpaevtyń demeýshiligimen qalamger turǵan úı 10 mln teńgege satyp alynyp, odan mýzeı jasaqtalyp, memleket qaramaǵyna berildi. Sondaı-aq, Shyńǵystaı aýylynda «Tór Altaı boıaýlary» respýblıkalyq plener-kórmesi uıymdastyrylyp, 2 avtokólik tigilgen alaman báıge ótti. Astanada Oralhan Bókeıdiń 80 jyldyǵyna arnalǵan konferensıada jazýshynyń shyǵarmalary men ol týraly estelikter jınalǵan «Sholpandaı tań aldynda týyp – batty» kitabynyń tusaýy kesildi. Mereıtoı aıasyndaǵy is-sharalar jazýshynyń jastyq shaǵy ótken Almaty qalasynda da jalǵasty. Keńsaıdaǵy qalamger qabirine zıarat jasalyp, Ulttyq kitaphanada «Ór Altaıdyń asqaq jyrshysy» atty konferensıa ótti.
Ádebıet áleminde óshpes mura qaldyrǵan Ór Altaıdyń Oralhanyn ulyqtaý maqsatynda sharalar Aýyldyq aımaqty turaqty damytý qory men Qatonqaraǵaı aýdanynyń kásipkerleriniń bastamasymen ótti.