Osy aıdyń jartysynan aýa bastalǵan «Qaýys» amaly máresine jetti. Amal boıynsha, osy kezde jeńil ári jumsaq qar jaýatyn bolǵan. Jańbyr jaýdy, biraq qar kórinis bermedi. Aýa raıy birtindep sýyı bastady.
«Qarasha kelmeı, qar jaýmas» deıdi. Qar qarashanyń alǵashqy kúnderinde túsip, erimeı jatyp qalsa, qys uzaq bolady dep boljaǵan. Adamdy, maldy yqtyryp, bet qaratpaıtyn sýyq jel soǵady, ony el arasynda yqtyrma jel dep ataıdy. Mundaı jaǵdaı Almatyda bolmaǵanymen, astanada, elimizdiń shyǵysy men soltústiginde tolyq deńgeıde kórinis berdi.
«Ótken táýlikte Astana Tótenshe jaǵdaılar departamentiniń qyzmetkerleri 28 ret shaqyrýǵa shyqty. Olardyń ishinde rastalmaǵan 3 fakt, 10 órt oqıǵasy, 12 avarıalyq-qutqarý jumysy jáne t.b.», delingen habarda.
«Pavlodarda daýyl kezinde 100-ge tarta aýylda jaryq sónip qalǵan. Degenmen, 60 eldimekende úzilgen symdar qaıta jalǵanyp, tok berildi degen habar jetti. Ázirshe 40 aýyl jaryqsyz otyr», – deıdi Tótenshe jaǵdaılar qyzmeti ókilderi.
Ótkende jańa aı týdy. Jeltoqsan aıy. Kók júzinde shanshylyp turdy. Qystyń basynda aıdyń bulaı kóringenin sońǵy 15–20 jylda kórmep edik, kómeıden eriksiz jyr tógildi...
«Jeltoqsannyń aıy týdy jap-jańa,
Kelbetinen tapty daýa: jan, sana.
Qys basynda alshysynan týypty,
Kózimdi almaı turmyn qarap tańdana.
Aı – qazaqtyń ortaq bolǵan syryna,
Aı – qazaqtyń muńdas bolǵan muńyna...
Aı týraly talaı jazyp júrsem de,
Alǵash ret arqaý ettim jyryma.
Aı týraly tartpappyn-aý men qalam,
Shapaǵynan nurǵa bókken bar ǵalam.
Aıǵa qarap bolashaǵyn boljaǵan,
Qazaǵymnyń aqylyna tańqalam.
Qazaq degen adamzattyń kónbisi,
Aımen birge oryndalǵan ońdy isi.
Jeti túnde týra joldy nusqaǵan,
Aı – qazaqtyń buljymaıtyn komposy.
Jeltoqsannyń aıy týdy ońynan,
Altyn nuryn sebelep tur molynan...
Qystyń basy shýaqty bop bastaldy,
Kim biledi... ne bolaryn sońynan...».
Aıdyń 23 kúni, búgin Mergen juldyzdar shoǵyry tórge ozyp, tóbege shyǵady. Ol – «Qus jolynda» Búrkit, Qalqan, Jylanbóktergen, Saryshaıan, Ońtústik Táj, Teleskop jáne Eshkimúıiz shoqjuldyzdarynyń aralyǵynda oryn tepken. «Qus joly» kúzdiń sońynda baýyry aǵaryp turady. Mergen juldyzy aıasynda ómirge kelgenderdi – mereke men dýmannyń adamy dep aıtýǵa bolady.
23–30 qarasha aralyǵynda aýa raıy qubylmaly bolady. Jaýyn-shashyn, aıtarlyqtaı yzǵar oryn alady...