Alataý aýdanynyń turǵyndary Konstıtýsıa kúnin atap ótti
Almaty qalasy Alataý aýdany ákiminiń apparaty Qazaqstan Respýblıkasynyń Konstıtýsıa kúni merekesi qarsańynda aýdan turǵyndaryna arnap «Aıbarly asqar eldi asqaqtatar Ata Zań» atty erekshe merekelik is-shara ótkizdi.
– Eldigi men teńdigin dúnıeniń tórt qubylasyna pash etken Táýelsiz Qazaqstanymyzdyń altyn árippen jazylǵan Ata Zańyn qabyldaǵanyna bıyl – 27 jyl. Qoǵam damýynyń negizgi mindetteri men talaptaryna saı keletin elimizdiń Konstıtýsıasyn damyǵan elder men halyqaralyq birlestikter tanyp, bilip, qurmet tutyp moıyndap otyr. Ǵasyrlar qoınaýynan suryptalyp jetken, ata-babamyzǵa arman bolǵan táýelsiz eldiń Konstıtýsıasy kúni otanymyzdyń árbir azamaty úshin qasterli kún dep bilemiz. Sizderdi aıtýly merekemen shyn júrekten quttyqtaımyz! – dep sahna shymyldyǵyn ashqan merekelik keshtiń júrgizýshileri aýdan turǵyndaryna quttyqtaý joldap, jyly lebizderin bildirdi.
«Nurkent» yqshamaýdanyndaǵy Atletter aýyly aımaǵynda uıymdastyrylǵan saltanatty is-sharaǵa aýdan halqy óte kóp jınaldy. Álbette, mundaı saltanatty sharalardyń otandyq óner juldyzdarynyń qatysýynsyz ótpeıtini belgili. Atalmysh keshte Roza Rymbaeva, Talǵat Kúzembaev sekildi tanymal óner maıtalmandary ánnen shashý shashyp, kórermenderge kóterińki kóńil-kúı syılady. Mádenı sharada Alataý aýdanyndaǵy shyǵarmashylyq ujymdar da qalys qalǵan joq. Balalar óner mektebiniń uıymdastyrǵan konserttik baǵdarlama barysynda myń burala bı bılegen «Jas órken», «Aqnur» sekildi jas ónerpaz bıshiler tobyna súısinbegen jan qalmady. Qyzyqqa toly dýmandy keshte jas ánshiler áýelete án salyp, kópshiliktiń ystyq yqylasyna bólendi.
Alańnyń ekinshi shetinde qazaqsha kúres, asyq atý, arqan tartý, toǵyz qumalaq sıaqty ulttyq sport túrlerinen jarystar ótkizildi. Qoǵamdyq serýendeýmen jalǵasqan merekelik kóńil-kúı, ásirese, aýdannyń kishkentaı turǵyndaryna erekshe unaǵany anyq. Óıtkeni, aýdan ákimdigi búldirshinder úshin ártúrli oıyn alańdaryn ornatypty. Batýtqa sekirip, átkenshekte shyr aınalǵan búldirshinderdiń alańsyz kúlkisi Almaty aspanyn shaıdaı jaryq etip, kún sáýlesin tókpesine qoımady. Osylaısha ata-ájelerimen, áke-sheshelerimen birge kelgen kishkentaı búldirshinderdiń baqytty shaqtary men byldyrlaǵan tátti úni búgingi atalyp ótip jatqan merekeniń maǵynasyn tereńdete túskendeı boldy.
Elimizdiń órkendeýine jáne memlekettik bıliktiń qalyptasýyna, ekonomıka, áleýmet, mádenıet salalarynyń qarqyndy damýyna jol ashqan aıtýly merekeni Alataý aýdanynyń turǵyndary osylaı atap ótti. Keremet merekelik kóterińki kóńil-kúı syılaǵan uıymdastyrýshylarǵa jınalǵan jurtshylyq alǵystaryn jaýdyrdy.