Ábilhan Qasteev atyndaǵy QR Memlekettik óner mýzeıinde Málik Qaıdarovtyń «Meniń janymnyń boıaýlary» atty kórmesi ashyldy. Ekspozısıada 30-dan astam kórkem jáne grafıkalyq shyǵarma usynyldy.
Málik Qaıdarov – keskindemeshi, janrlyq týyndylar sýretshisi, qaıtalanbas kórkemdik álemin qamtıtyn aıaqtalǵan kompozısıalardy jasaı biletin portretshi sheber. Ekspozısıada sheberdiń kópfıgýraly keskindeme týyndylaryn jasaýǵa oılastyrylǵan kózqarasyn aıǵaqtaıtyn ár jyldardaǵy týyndylar men nobaılar usynylǵan. Sheber túrli ádisterdi, máselen, qaryndashtyń jumsaqtyǵyn, týsh syzyqtarynyń jyldamdyǵyn, pasteldiń tús qanyqtyǵyn kórsete otyryp, ashyq áreket arqyly lezde is-qımylmen sátti bekitýge qol jetkizedi.
Sýretshiniń kóptegen shyǵarmasy ómirbaıandyq reńkte kórinis tapqan. Ásirese, balalyq shaqtaǵy kórinister senimdi, jan dúnıeńe enip ketetindeı bop oryndalǵan. Jeke ómiriniń ótkenin beıneleı otyryp, aınalasyndaǵy adamdar men olardyń ortasynyń ulttyq bolmysynynyń ózgerýin ózine ǵana tán tásilmen beıneleıdi.
– Máliktiń shyǵarmashylyǵynda ulttyq erekshelikterge basa mán berilgetini daýsyz. Áıtse de, onyń kartınalarynda kópmádenıetti elementter bastaýy bar. Kórkemsýret mektebiniń negizin Máskeýde alyp, Batys Eýropa óneriniń úrdisterin ıgere otyryp, ol óz shyǵarmashylyǵynda ulttyq jáne óńirlik erekshelikterdiń estetıkalyq tájirıbesine asa qyzyǵýshylyq tanytady. Sýretshi úshin shartty nárse – kórgen, sezgen naqty dúnıesin óz álemine engizip, áserli, kórkem umtylý. Ásirese, onyń názik boıaýshy retindegi tańǵajaıyp daryndylyǵyn jáne shyǵarmashylyq máneriniń erekshelikterin aıǵaqtaıtyn eskızderi qyzyqty. Janrlyq kórinisterdi qamtıtyn erekshe peızajdary da áserli. Kúnge toly kompozısıalary Qazaqstannyń túrli aımaqtarynyń ómiri men baı tabıǵaty týraly baıandaıdy, – deıdi deıdi kórme jetekshisi, ónertaný kandıdaty Svetlana Kobjanova.