13 qarasha - Halyqaralyq zaǵıptar kúni.
Almatyda zaǵıp jandar arasynda qalalyq án baıqaýy ótti, dep habarlaıdy aqshamnews.kz
Qoǵamda kóz janarynan aıyrylsa da, múmkindigi sheksiz talaı jan bar. Búgin sondaı azamattardyń qatysýymen “Mega” oıyn-saýyq ortalyǵynda án baıqaýy uıymdastyryldy. 
İs-sharany Almaty qalalyq «Qazaqstan zaǵıptar qoǵamy» qoǵamdyq birlestigi Almaty qalasynyń Jumyspen qamtý jáne áleýmettik baǵdarlamalar basqarmasynyń qoldaýymen ótkizip otyr.
Shyǵarmashylyq saıysqa qaladaǵy kórý qabileti buzylǵan jáne nashar kóretin jandar qatysyp, olardyń ónerin kásibı qazylar alqasy baǵalady. Baıqaý talaby boıynsha ár qatysýshy 2 ánnen, onyń biri qazaqsha án oryndady. 16 qatysýshynyń ánderi de Otan, týǵan jer, Almaty taqyryptarynda boldy. Arnaıy mýzykalyq bilimi bolmasa da, sheberlikpen shyrqap shyqty.
Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov "Almaty - teń múmkindikter qalasy"qaǵıdasyn júzege asyryp, qalamyzda ınklúzıvti ortany qalyptastyrýda osyndaı sharalardyń mańyzy zor ekenin atap ótti.
Baıqaý qatysýshylarynyń biri - Mereke Jumabekovanyń kózi týǵanynan kórmeıdi. Búginde ol Qazaq sport jáne týrızm akademıasynyń 4-kýrs stýdenti. Mundaı baıqaýǵa alǵash ret qatysyp otyr.
“Qaladaǵy zaǵıptar qoǵamy osyndaı sharalardy jıi uıymdastyratynyn estıtinmin. Osy joly maǵan da qatysýǵa usynys jasady. Án aıtqandy jaqsy kóremin. Sol úshin de qýana qabyl aldym. Baıqaýda Roza Rymbaevanyń “Kýá bol” jáne Jazıra Baıyrbekovanyń oryndaýyndaǵy “Armansyz kúnim bolmaıdy” ánderin oryndadym”, - deıdi Mereke.
Almaty qalalyq «Qazaqstan zaǵıptar qoǵamy» qoǵamdyq birlestiginiń tóraǵasy Altynaı Qońyratbaıqyzy: “İs-sharanyń máni - tek shyǵarmashylyq jarys emes, ınklúzıany qoldaý, kórý qabiletinen aıyrylǵan jandardyń qoǵamdaǵy rólin kúsheıtý” dedi.
“Osyndaı baıqaýlar zaǵıp jandardyń qoǵamǵa enýine, ónerin shyndaýyna, damytýyna úlken úles qosatynyna senemiz. Qalalyq Jumyspen qamtý jáne áleýmettik baǵdarlamalar basqarmasynan úlken qoldaý bolyp, is-sharany uıymdastyryp otyrmyz. Múmkindigi shekteýli jandardyń múmkindigin sheksiz etip, basqalar sıaqty ózderiniń quqyǵy teń bolýy úshin jasalyp jatqan amal. Bul da ınklúzıalyq orta qurýǵa bir qadam dep aıtýǵa bolady. Almaty qalalyq «Qazaqstan zaǵıptar qoǵamy» qoǵamdyq birlestiginiń myńnan astam múshesi bar. Sol jandardyń basyn qosyp, áleýmettik jaǵdaıyna kómektesip turamyz. Tórt qabyrǵanyń ishinde otyryp qalmaı, qoǵammen aralasýyna jaǵdaı jasaımyz”,- deıdi ol.