Elimizde alǵashqy bolyp ekpe saldyrǵan – memlekettik qyzmetshiler. Olardan keıingi qatarda óz densaýlyǵyna beıjaı qaramaıtyn eriktiler tur. Bulardan sál keıinirek oılanyp-tolǵanyp, ekpeniń paıdasy men zıanyn tarazyǵa tartyp baryp, keshteý bolsa da jaýapkershilik tanytqandar boldy.
Qazirgi kezde vaksına saldyryp jatqandardy da eki topqa bólýge bolady: alǵashqy top – tóńirektiń bári aýyryp jatqandyqtan, vırýstan shynymen qorqyp baryp sanaly túrde ekpe alǵandar, ekinshisi – jumys ornynyń talap etýimen barǵandar.
Men de ekpe saldyrdym. Alǵashqyda eki oıly bolǵanym ras. Biraq balalarymdy oıladym. Ákesi ekeýmiz jumysqa baramyz, adam aǵylǵan kóshede júremiz, sondyqtan ekpe saldyrǵanym durys shyǵar degen oıǵa toqtadym. Ekpe saldyrý óziniń densaýlyǵyna, otbasy men jaqyndary aldyndaǵy jaýapkershiligine baılanysty árkimniń jeke sheshimimen júzege asady.
Arasyna 21 kún ýaqyt salyp, ekpeniń eki dozasyn da saldyrdym. Men barǵan emhanada «Spýtnık V» ǵana bar bolyp shyqty sol kezde. Sondyqtan men vaksınanyń osy túrin saldyrdym. El arasynda taraǵan «aýrý-saýyńa qarap jatqan eshkim joq, anyqtamastan ekpe salyp jatyr» degen faktiniń ótirik-rastyǵyn da jýrnalısik qyzyǵýshylyqpen tekserip kórdim. Men barǵan emhananyń dárigeri qan qysymymdy ólshep, juqpaly, tuqym qýalaıtyn aýrýlarymnyń bar-joǵyn surastyryp baryp, ekpege joldama berdi. Ekpe saldyrǵannan keıin jarty saǵat kútý bólmesinde otyryp, ýaqyt ótken soń, dárigerge qaıta baryp, nátıjesin aıtyp ketýimdi talap etti. Ekpeden keıin densaýlyǵyńda ózgeris bolyp jatsa dep, ishýge bolatyn dári-dármektiń tizimin aıtty.
Eki komponentten keıin de mende qan qysymynyń ózgerisi, álsizdik pen tersheńdik boldy. Sol sebepti bir apta qashyqtan jumys isteýge ruqsat aldym. Joldasym jumysta júrip ekpe saldyrsa da, densaýlyǵynda esh ózgeris bolǵan joq. Sondyqtan bul ózgerister ár adamnyń aǵzasynyń daıyndyǵyna, ereksheligine baılanysty bolar dep oıladym. Dárigerden suraǵanymda, bul oıymdy rastady.
Jańa oqý jyly jaqyndap qalǵandyqtan, ata-ana retinde balamyzdyń densaýlyǵy úshin alańdaımyz. Bir jarym jyldyq onlaın oqýdyń tıgizgen kesirin de bilemiz. Balalarymyzdyń sapaly bilim alyp, mektepke oralýy úshin ekpe saldyrýǵa salǵyrt qaramaǵanymyz jón.