Almaty qalasynyń Kólik ıelerine arnalǵan Halyqqa qyzmet kórsetý ortalyǵyna kelýshiler úshin «Men densaýlyqty tańdaımyn! Biz týberkýlezdi jeńe alamyz!» naýqany ótkizildi, dep habarlaıdy Almaty-akshamy.kz.
15 naýryzda Búkilálemdik týberkýlezben kúres kúni aıasynda Almaty qalasy Alataý aýdanyndaǵy qala turǵyndary jappaı baratyn oryndardyń biri - Mamandandyrylǵan kólik ıelerine arnalǵan HQK ortalyǵynda Qoǵamdyq densaýlyq saqtaý basqarmasy uıymdastyrǵan «Men densaýlyqty tańdaımyn! Biz týberkýlezdi jeńe alamyz!» keń aýqymdy naýqany ótkizildi.
İs-shara barysynda №29 qalalyq emhana men ftızıopýlmonologıa ortalyǵynyń mamandary qala turǵyndarynyń nazaryn týberkýlezdyń aldyn alý men eskertýge basa aýdardy.
Jumys isteıtin qala turǵyndarynyń kópshiligi orta jastaǵy turǵyndar, olar medısınalyq qyzmetkerlerdiń shaqyrtýlaryna qaramastan, ýaqtyly aldyn ala qaraýlardan jáne skrınıngterden óte bermeıdi.
Naýqan ýaqytynda halyqty barynsha qamtý óziniń nátıjesin bergenimen qýantady. Osylaısha, naýqan nátıjesi boıynsha 500 adam qaraldy. Júzge tarta almatylyq arnaıy uıymdastyrylǵan qozǵalmaly keshende flúrografıadan ótse, shamamen 300 adam ftızıatr-pýlmonolog, terapevt dárigerleriniń keńesin aldy. 400-den asa almatylyq qan quramyndaǵy qant, holesterındi anyqtaý, kóz qysymyn ólsheý, spırografıa, ekspress-skrınıngten ótti.
№29 qalalyq emhananyń bas dárigeri Aqmıra Sadyqova: "Tekserýden ótken árbir qatysýshy ekspress-skrınıngtiń nátıjesin aldy. Al flúrografıalyq zertteýdiń nátıjesine keletin bolsaq, ol pasıentterge rentgenolog-dáriger qaıtalap qaraǵannan keıin jetkiziletin bolady", -deıdi.
İs-shara barysynda halyq arasynda túsindirý jumystary júrgizildi, turǵyndardy mazalǵan suraqtarǵa jaýap berilip, týberkýlezdyń aldyn alý men emdeý boıynsha beınebaıandar kórsetildi. Sondaı-aq, №29 qalalyq emhanada tirkelgen turǵyndar úshin ftızıopýlmonologıa ortalyǵy jáne sanıtarlyq -epıdemıologıalyq baqylaý komıteti mamandarynyń qatysýymen Ashyq esik kúni uıymdastyryldy.
Elimizde, DDSU sońǵy usynystaryna sáıkes, týberkýlezdi anyqtaý men dıagnostıkalaý úshin tekserýdiń barlyq dıagnostıkalyq ádistemeleri engizilgenin eske salamyz. PTR dıagnostıkasy jolǵa qoıylǵan, ol gendik deńgeıde eki saǵat ishinde týberkýlezdiń bar ekenin anyqtaýǵa jáne birinshi kúnnen bastap em taǵaıyndaýǵa múmkindik beredi.
«Joǵarǵy táýekel jasyndaǵy halyq toby skrınıngten - eresekter flúrografıa, al balalar men jas jetkinshekter týberkýlezdik dıagnostıkadan ótedi. Tıimdi emdeý kýrsyn júrgizý úshin pasıentter týberkýlezge qarsy preparattardyń qajetti jıyntyǵymen tolyq qamtamasyz etilgen. Árqaısymyz týberkýlezdi kez kelgen jerden juqtyrýymyz múmkin ekenin túsinýimiz qajet. Bul aýrýdan eshkim saqtandyrylmaǵan. Aýrý neǵurlym erte anyqtalsa, ony emdeý neǵurlym erterek bastalsa, soǵurlym aýrýdy emdeý ári otbasy jáne jalpy qalanyń epıdemıologıalyq jaǵdaıy jeńil bolady», -dep qorytyndylaıdy Aqmıra Sadyqova.
Mundaı is-sharalar ókpe aýrýlaryn ýaqtyly anyqtaý men emdeýge nazar aýdartýǵa, densaýlyqqa jaýapkershilikpen qaraýǵa septigin tıgizedi. Sonymen qatar, medısınalyq qyzmetker men pasıentke «Biz týberkýlezdi jeńe alamyz» dep birge jeńiske jetýge kómektesedi.