Saılaý naýqany barysynda kandıdattar sotqa shaǵymdanyp, 166 aryz túsirdi, dep habarlaıdy Almaty-akshamy.kz QazAqparat-qa silteme jasap.
«Sotqa Parlament Májilisi men máslıhattar depýtattyǵyna kandıdattardan 166 aryz kelip tústi. Onyń ishinde Joǵarǵy sotqa 55, mamandandyrylǵan aýdanaralyq ákimshilik sottarǵa 104 jáne aýdandyq sottarǵa 7 aryz berildi. Búginde sotta 164 aryz-shaǵym qaraldy. Onyń ishinde 49 is qanaǵattandyryldy, 84 is boıynsha qanaǵattandyrýdan bas tartyldy, 15 talap qoıýshy aryzyn keri qaıtaryp aldy jáne sot 16 aryzdy qaraýsyz qaldyrdy», - dedi Ortalyq saılaý komısıasynyń múshesi Asylbek Smaǵulov.
Onyń aıtýynsha, Saılaý týraly Konstıtýsıalyq zańnyń 89-baby 4-3-tarmaǵynyń 4-tarmaqshasyna, 104-baby 6-1-tarmaǵynyń 4-tarmaqshasyna sáıkes okrýgtik saılaý komısıasy deklarasıada aktıvter men mindettemeler týraly málimetterdiń durys emestigi anyqtalǵan jaǵdaıda kandıdatty tirkeý týraly sheshim kúshin joıady.
«Aýdandyq komısıalardyń sheshimderimen Parlament Májilisiniń depýtattyǵyna 6 kandıdattyń quqyǵy qalpyna keltirildi. Onyń ishinde Astana qalasy boıynsha 5 jáne Shymkent qalasy boıynsha bireý. Sotqa túsken 166 aryzdyń 135-in depýtattyqqa kandıdattar usynǵan aktıvter men mindettemeler týraly deklarasıalardaǵy málimetterdiń durys emestigi týraly, sol sıaqty memlekettik kiris organdarynan aqparat usynylǵannan keıin saılaý komısıalary qabyldaǵan kandıdattardy tirkeýdiń kúshin joıýǵa qatysty», - deıdi ol.