Qazaqstanda 2025 jylǵy 1 qańtardan bastap kúshine engen jańa jeńildetilgen erejeler boıynsha memlekettik satyp alý týraly alǵashqy sharttar jasaldy.
Olardy qabyldaý jobalardy, sonyń ishinde áleýmettik mańyzy bar jobalardy jedel iske qosýǵa jáne olardyń baǵasynyń kóterilý qaýpin azaıtýǵa múmkindik beredi. Jeńimpazdar negizinen jergilikti kompanıalar bolady, bul aımaqtardyń bıznesi men ekonomıkasyna qoldaý bolyp sanalady.
Aqmola oblysy Zerendi aýylynda balalar men jasóspirimder sport mektebiniń qurylysy boıynsha baıqaý elimizde alǵashqylardyń biri bolyp jańa erejeler boıynsha ótkizildi. Bıylǵy 8 qańtarda jarıalanyp, qorytyndysy 6 jumys kúni ishinde shyǵaryldy jáne 16 qańtarda qurylys salýshy jumysqa kiristi.
«Jobanyń quny 2 mlrd teńgeden asady. Merdiger reıtıńtik-baldyq júıeni qoldana otyryp, jańa memlekettik satyp alýlar boıynsha tańdaldy, bul konkýrs merzimin aıtarlyqtaı qysqartty. Bul bizge qurylysty 16 qańtarda bastap ketýge múmkindik berdi. Joba jyl sońyna deıin aıaqtalady jáne nysan paıdalanýǵa beriledi. Sondaı-aq biz júıede qosymsha bal alatyn jergilikti qurylys salýshylarǵa nazar aýdaramyz, bul olardyń qatysýyn yntalandyrady», — dedi Aqmola oblysynyń qurylys, sáýlet jáne qala qurylysy basqarmasy basshysynyń mindetin atqarýshy Azamat Baıqýanyshev.
Sport mektebiniń ǵımaraty ótpe jol arqyly bir-birimen baılanysqan eki bloktan turady. Munda trenajer zaly, hokeı korty jáne basqa da jattyǵý alańdary jumys isteıtin bolady. Qurylys materıaldarynyń 90%-yn jergilikti óndiristen alý josparlanýda. Aýyldyq sport mektebiniń jalpy qabyldaý múmkindigi – aýysymda 78 adam.
Jańa erejeler boıynsha 330 adam turatyn Batys Qazaqstan oblysynyń Jalyn aýylynda sý qubyryn salý boıynsha konkýrs ótkizildi. Jeńildetilgen júıeniń arqasynda satyp alý prosedýrasy alty kúnde júrgizildi, bul jergilikti qurylys salýshyǵa jumysqa tez kirisýge múmkindik berdi. Jobanyń quny – 785 mln teńgeden astam. Sý qubyrynyń qurylysy aýyl turǵyndaryn sapaly aýyz sýmen qamtamasyz etedi.
Sonymen qatar Túrkistan oblysy Saryaǵash qalasynda jańa býyndy damytý ortalyǵynyń qurylysy bastaldy. Jobanyń quny – 2,7 mlrd teńgeden astam. Merdiger 8 jumys kúni ishinde reıtıńtik-baldyq júıeni qoldana otyryp tańdalǵan jergilikti kompanıalardyń biri boldy.
Shymkent qalasynyń Bozaryq shaǵyn aýdanynda kópqabatty turǵyn úıler salý jobasy boıynsha satyp alý rásimi 7 jumys kúni ishinde júrgizildi. Jobanyń quny – 4,9 mlrd teńgeden astam.
Ulytaý oblysynyń Myńadyr stansasynda mektep salý boıynsha satyp alý rásimi 5 jumys kúni ishinde júrgizildi, merdiger jergilikti kompanıa boldy. Jańa mektep salý oqýshy oryndarynyń tapshylyǵy máselesin sheshedi. Qazirgi jumys istep turǵan mektepte oryn sany jetkiliksiz, sport zaly da joq. 80 orynǵa eseptelgen eki qabatty jańa mekteptiń kabınetteri sapaly bilim berý úderisin qamtamasyz etý úshin zamanaýı jabdyqtarmen qamtylady.
Jańa erejelerge sáıkes, osy jyldyń 10 aqpanyndaǵy jaǵdaı boıynsha Qazaqstanda 951,38 mlrd teńge somasyna 282 703 shart jasaldy. Salystyrý úshin: ótken jyldyń tıisti kezeńinde 223,2 mlrd teńgege 165 558 shart jasalǵan.
Berilgen shaǵymdardyń sany ótken jylmen salystyrǵanda 22%-dan astamǵa: 1700-den 1320-ǵa deıin tómendedi.