Mádenıet jáne sport mınıstrliginiń aldynda memlekettik rámizderdiń mereıtoıyn joǵary deńgeıde ótkizý mindeti tur - Dáýren Abaev
Mádenıet jáne sport mınıstri Dáýren Abaev shyǵarmashylyq jáne zıaly qaýym ókilderiniń jáne respýblıkalyq mańyzy bar qalalar men oblys ákimderi orynbasarlarynyń qatysýymen memlekettik rámizderdiń 30 jyldyǵyn merekeleýge arnalǵan keńes ótkizdi, dep habarlaıdy Almaty-akshamy.kz Elorda.info saıtyna silteme jasap.
«Tarıhı turǵydan alǵanda, elimizdiń basty rámizderi erkindikti beıneleıdi jáne azamattarymyzǵa patrıottyq rýh beredi. 30 jyl ishinde qoǵamda memlekettik rámizderdi qurmetteý mádenıeti qalyptasty, endi ony qoldap jáne ilgeriletý qajet», - dep atap ótti Dáýren Abaev.
Onyń aıtýynsha, Mádenıet jáne sport mınıstrliginiń aldynda memlekettik rámizderdiń mereıtoıyn joǵary deńgeıde ótkizý mindeti tur. Bul rette, mınıstr atap ótkendeı, negizgi nazar is-sharalardyń sany men kólemine emes, olardyń mán-mazmuny men uıymdastyrý sapasyna aýdarylatyn bolady. Atap aıtqanda, ǵylymı-praktıkalyq konferensıalar, mektepterde ashyq sabaqtar men synyp saǵattaryn, kórmeler jáne t.b. ótkizý josparlanǵan.
Dáýren Abaev is-sharalar men kampanıalarǵa qatysýdyń májbúrli tártibin boldyrmaýǵa shaqyrdy.
«Atqarylatyn jumystyń basty maqsaty – otandastarymyzdyń, ásirese, jastardyń Memlekettik rámizder kúnin jan-júregimen sezinip, maqtan tutýyna jaǵdaı jasaý – Prezıdent aıqyndaǵan "Jańa Qazaqstandy" qurý jolyndaǵy mańyzdy qadam», - dedi mınıstr.
Keńes barysynda Memlekettik Eltańbanyń avtory Jandarbek Málibekov, ǵalym Jambyl Artyqbaev, Almaty qalasy ákiminiń orynbasary Arman Qyryqbaev jáne Shyǵys Qazaqstan oblysy ákiminiń orynbasary Azamat Muhamedchınov sóz sóıledi.