Qazaqstan Respýblıkasy Mádenıet jáne aqparat mınıstrliginiń Arhıv, qujattama jáne kitap isi komıteti geraldıkalyq jumys basqarmasy men «Geraldıkalyq zertteýler ortalyǵy» RMM-niń uıymdastyrýymen «Memlekettik rámizder men vedimistik jáne olarǵa teńestirilgen ózge de nagradalar geraldıkasy máseleleri» taqyrybynda respýblıkalyq semınar ótti.
Eki kúndik semınarǵa elimizdiń barlyq óńirlerinen memlekettik organdardyń, sondaı-aq Qazaqstan Respýblıkasy İshki ister mınıstrligi men Saýda jáne ıntegrasıa mınıstrliginiń ókilderi, Májilis depýtattary men qoǵam qaıratkerleri qatysty, dep habarlaıdy aqshamnews.kz.
İs-sharanyń basty maqsaty – memlekettik rámizder men vedimistik nagradalar geraldıkasyn talqylaý, olardy nasıhattaý, ulttyq standarttar men zań talaptarynyń saqtalýyn qamtamasyz etý, sondaı-aq adal eńbek ıelerin marapattaý rásimin birizdendirý.
Aıta keteıik, Memleket basshysy Ulttyq quryltaıda geraldıka máselesine birneshe márte toqtalyp ótken bolatyn. Máselen, Túrkistanda ótken Ulttyq quryltaıda óńirlik nyshandardy júıeleý máselesin kóterse, taıaýda Býrabaıda ótken jıynda vedimistik marapattardy retke keltirýdi tapsyrdy.
Jıyn barysynda óńirlik nyshandardy zań talaptaryna sáıkes bekitý jáne olardy birizdendirý, memlekettik rámizderge qatysty quqyq buzýshylyqtardy der kezinde anyqtap, tıisti sharalar qabyldaý, memlekettik rámizderdi paıdalaný tártibi men ulttyq standarttardyń saqtalýy, sondaı-aq Memlekettik rámizder kúnin merekeleý máseleleri talqylandy.