2015 jylǵy 23 qarashadaǵy №416-V QRZ «Qazaqstan Respýblıkasynyń memlekettik qyzmeti týraly» Zańyna sáıkes, memlekettik qyzmet – bul memlekettik qyzmetshilerdiń memlekettik organdarda memlekettik bıliktiń mindetteri men fýnksıalaryn iske asyrýǵa baǵyttalǵan laýazymdyq ókilettikterdi atqarýy.
Memlekettik qyzmettiń quqyqtyq negizin Qazaqstan Respýblıkasynyń Konstıtýsıasy, Qazaqstan Respýblıkasynyń Eńbek kodeksi, joǵaryda atalǵan Zań, sondaı-aq basqa da normatıvtik quqyqtyq aktiler quraıdy.
Memlekettik qyzmetshi óz ókilettikterin adal jáne kásibı túrde júzege asyrýy tıis. Ol kez kelgen jaǵdaıda halyqtyń, el azamattarynyń senimin joǵaltpaı jumys isteýi kerek. Osy maqsatta memlekettik qyzmetshilerdiń negizgi mindetteri aıqyndalǵan.
Memlekettik qyzmetshilerdiń negizgi mindetteri:
- Qazaqstan Respýblıkasynyń Konstıtýsıasy men zańdaryn saqtaý;
- Azamattar men zańdy tulǵalardyń quqyqtaryn, bostandyqtary men zańdy múddelerin qorǵaý jáne olardyń ótinishterin zańnamada belgilengen tártippen qaraý;
- Laýazymdyq mindetterdi tıimdi oryndaý úshin kásibı deńgeıin jáne biliktiligin arttyrý;
- Laýazymdyq ókilettikterdi júzege asyrý kezinde saıası partıalardan, qoǵamdyq jáne dinı birlestikterden beıtarap jáne táýelsiz bolý;
- Qyzmettik tártipti saqtaý jáne zańmen qorǵalatyn qupıany saqtaý;
- Azamattardyń jeke ómirine qatysty aqparatty jarıalamaý;
- Memlekettik múliktiń saqtalýyn qamtamasyz etý jáne ony tek qyzmettik maqsatta paıdalaný;
- Sybaılas jemqorlyq quqyq buzýshylyq jaǵdaılaryn habarlaý jáne olardyń aldyn alý;
- Qyzmettik ádepti saqtaý;
- Memlekettik organnyń aqparattyq qaýipsizdigin qamtamasyz etý.
Memlekettik qyzmetshilerdiń basqa da mindetteri Qazaqstan Respýblıkasynyń zańdarynda jáne Qazaqstan Respýblıkasy Prezıdentiniń aktilerinde kórsetilýi múmkin.
Memlekettik qyzmetshiler adal qyzmet atqarý arqyly memlekettik qyzmettiń bedelin arttyryp, halyqtyń senimin nyǵaıta alady. Memleket qyzmetin nyǵaıtýǵa, zańdylyqtyń saqtalýyna jáne qoǵamnyń órkendeýine árbir memlekettik qyzmetshi óziniń úlesin qosýy tıis.